Biełaruś i Pakistan mohuć pavialičyć uzajemny tavaraabarot da 1 młrd. dołaraŭ, zajaviŭ Alaksandr Łukašenka 11 žniŭnia na biełaruska-pakistanskim biźnies-forumie, jaki prachodzić u Nacyjanalnaj biblijatecy Biełarusi.
Pavodle jaho słoŭ, 2015 hod staŭ znakavym dla biełaruska-pakistanskich adnosin. «Stvorana tryvałaja asnova dla zbližeńnia našych krain u samych roznych śfierach — palitycy, ekanomicy, navucy, adukacyi i kultury», — skazaŭ Łukašenka.
Biełaruski kiraŭnik pierakanany, što ciapierašni biźnies-forum budzie spryjać pavieličeńniu ŭzajemnaha tavaraabarotu pamiž Biełaruśsiu i Pakistanam na praciahu najbližejšych hadoŭ.
«Ja pamiataju, što my sa spadarom premjer-ministram u Isłamabadzie (vizit Łukašenki ŭ Pakistan u mai 2015 hoda. — BiełaPAN.) pastavili pierad saboj metu dasiahnuć tavaraabarot u miljard dołaraŭ. I dla hetaha jość usie pieradumovy, jość tyja tavary, u jakich majem patrebu my i ŭ jakich maje patrebu Pakistan, — zajaviŭ Łukašenka. — Voś čamuści siońnia mnie ścipła prapanoŭvajuć na praciahu najbližejšych dvuch-troch hadoŭ pavialičyć tavaraabarot u dva razy. Što, my budziem taptacca na miescy? 100 młn. dołaraŭ — heta chiba tavaraabarot dla ekanomik takich krain? Tamu, ja dumaju, što premjer-ministr Pakistana mianie ŭžo i ŭ Minsku padtrymaje, što nam treba pastavić pierad saboj metu pavieličeńnia tavaraabarotu da miljarda dołaraŭ».
Kiraŭnik dziaržavy ŭdakładniŭ, što dahetul tavaraabarot pamiž Biełaruśsiu i Pakistanam byŭ zusim nievialikim — «50, nu, 65 młn. dołaraŭ u hod».
Jon dadaŭ, što i Biełaruś, i Pakistan zacikaŭleny ŭ pastupovym pierachodzie ad uzajemnaha handlu da vytvorčaj kaapieracyi, u pryvatnaści, u takich śfierach, jak enierhietyka, suviaź, łahistyka, bijatechnałohii, farmakałohija, infarmacyjnyja i kamunikacyjnyja technałohii.
