Žančyny čarhovy raz pakazali, što zdolnyja nie sastupić «mocnamu połu» va ŭsim, i pačali novuju staronku vajskovaj historyi, paśpiachova skončyŭšy adzin z samych ciažkich kursaŭ bajavoj padrychtoŭki — kurs padrychtoŭki rejndžaraŭ armii ZŠA, pišuć ŚMI.
Fota Rojterz.
Kapitan Krysten Hryst i pieršy lejtenant Šaja Hevier - pieršyja žančyny, jakija prajšli kurs rejndžaraŭ.
Kvalifikacyjny znak rejndžara — znak najvyšejšaj fizičnaj zdolnaści, najaŭnaści parašutnaj, hornaj, raźviedvalnaj, dyviersijnaj i šturmavoj padrychtoŭki. Taki znak - honar luboha amerykanskaha vajskoŭca.
U krasaviku hetaha hoda ŭ škołu rejndžaraŭ paśla ciažkaha adboračnaha konkursu ŭpieršyniu trapili 19 žančyn, 2 ź jakich zmahli prajści ŭsie vyprabavańni 62-dzionnaha kursu. Razam ź imi biŭsia za prava atrymać znak elitnych častak amierykanskaj piachoty 381 mužčyna, ź jakich 94 skončyli kurs.
Dva hady tamu Pientahon, vypracoŭvajučy ahulnyja dla mužčyn i žančyn standarty fizičnaj i bajavoj padrychtoŭki, pačaŭ adkryvać dla apošnich tysiačy novych pasadaŭ, najpierš źviazanych ź niepasrednym udziełam u bajavych dziejańniach. Heta było vyklikana jak palityčnymi matyvami - zmahańniem fieministyčnych arhanizacyj, hetak i razumieńniem taho, što žančyny mohuć być mocnym rezervam i krynicaj talentaŭ dla armii. Da taho ž udzieł u bajach źjaŭlajecca važnym faktaram dla paśpiachovaj vajskovaj karjery.
Takim ž faktaram źjaŭlajecca i najaŭnaść kvalifikacyi rejndžara - kala 90% najvyšejšaha aficerskaha składu suchaputnych sił ZŠA majuć adpaviedny znak. Prykładna 12% amierykanskich vojsk u Iraku i Afhanistanie byli žančynami. Z ahulnych strataŭ na ich prychodzicca 2%.
