Prezident Ukrainy Piatro Parašenka vyklučaje praviadzieńnie ŭ Minsku novych pieramoŭ na vyšejšym uzroŭni pa ŭrehulavańni situacyi va Ukrainie. Pra heta jon zajaviŭ na sumiesnaj pres-kanfierencyi z prezidentam Jeŭrakamisii Žan-Kłodam Junkieram, jakaja adbyłasia 27 žniŭnia ŭ miežach rabočaha vizitu Parašenki ŭ Bielhiju.
Pavodle słoŭ ukrainskaha lidara, jość kompleks minskich damoŭlenaściaŭ, jakija treba vykonvać. «Chaču asobna padkreślić: nie isnuje i nie budzie isnavać nijakaha Minska treciaha. U nas isnuje ŭvieś kompleks minskich damoŭlenaściaŭ… Ich treba vykonvać», — cytuje Parašenku infarmahienctva UNIAN.
Pieršyja mirnyja damoŭlenaści pa Ukrainie byli dasiahnutyja 5 vieraśnia 2014 hoda padčas pieramoŭ u Minsku kantaktnaj hrupy pa ŭrehulavańni situacyi ŭ rehijonie.
Druhoje pahadnieńnie, jakoje ŭjaŭlaje saboj kompleks mier pa vykanańni pryniatych u vieraśni damoŭlenaściaŭ, było pryniataje ŭ Minsku 11—12 lutaha 2015 hoda na samicie lidaraŭ krain «narmandskaj čaćviorki» — Hiermanii, Francyi, Ukrainy i Rasii.
26 žniŭnia ŭ Minsku prajšli čarhovyja kansultacyi trochbakovaj kantaktnaj hrupy pa Ukrainie z udziełam pradstaŭnikoŭ asobnych rajonaŭ Danieckaj i Łuhanskaj abłaściej, a taksama pieramovy ŭsich čatyroch padhrup — pa ekanamičnych, palityčnych, humanitarnych pytańniach i pytańniach biaśpieki.
Kamientujučy vyniki pieramoŭ, śpiecpradstaŭnik staršyni ABSIE Marcin Sajdzik paviedamiŭ, što padhrupa pa palityčnych pytańniach pradoŭžyła «dyskusii adnosna zakona ab asablivym statusie i madalnaściach praviadzieńnia miascovych vybaraŭ». Padhrupa pa ekanamičnych pytańniach abmierkavała płanavańnie raboty niamieckaj ekśpiertnaj hrupy, jakaja budzie nakiravanaja na Danbas dla vyvučeńnia situacyi na dvuch abjektach vodazabieśpiačeńnia (u Danieckaj i Łuhanskaj abłaściach), jakija zabiaśpiečvajuć nasielnictva pa abodva baki ad linii sutyknieńnia.
Padhrupa pa pytańniach biaśpieki pradoŭžyła abmierkavańnie pytańnia ab advodzie ad linii sutyknieńnia ŭzbrajeńniaŭ kalibram mienš za 100 mm i režymie jaho vieryfikacyi 27 žniŭnia. Pra vyniki jaje raboty nie paviedamlajecca.
