U Mahilovie orhany pravaparadku aštrafavali na 90 tysiač rubloŭ uładalnika aŭtamabila «Piežo-308», na škle jakoha było napisana «Sievastopal Danieck Łuhansk Adesa» i naklejenaja šyrokaja hieorhijeŭskaja stužka.
Nahadajem, u pačatku žniŭnia staršynia Mahiloŭskaj abłasnoj arhanizacyi Abjadnanaj hramadzianskaj partyi Uładzimir Šancaŭ zapatrabavaŭ raspačynańnia kryminalnaj spravy ŭ dačynieńni da ŭładalnika «Piežo-308». Na dumku palityčnaha aktyvista, takoje pieraličeńnie haradoŭ paŭdniovaha ŭschodu Ukrainy i hieorhijeŭskaja stužka śviedčyć ab padtrymcy ŭładalnikam aŭtamabila sieparatyzmu i ekstremizmu ŭ družalubnaj susiedniaj krainie. Jon zapatrabavaŭ, kab aŭtamabilist byŭ pryciahnuty da adkaznaści na padstavie art. 130 UK (raspalvańnie rasavaj, nacyjanalnaj abo relihijnaj varožaści).
«Pravierku pa hetym fakcie pravioŭ učastkovy inśpiektar milicyi Leninskaha RAUS Mahilova. U vyniku kiraŭnictvam RAUS pryniataje rašeńnie ab tym, što ŭ dziejańniach vadziciela aŭtamašyny «Piežo» prykmiety składu złačynstva, praduhledžanaha art. 130 KK, adsutničajuć», — paviedamiŭ BiełaPAN načalnik upraŭleńnia achovy pravaparadku i prafiłaktyki UUS Mahiloŭskaha abłvykankama Pavieł Śmirnoŭ.
Razam z tym u dačynieńni da vadziciela «Piežo» składzieny pratakoł na padstavie art. 18.12 KoAP za parušeńnie praviłaŭ ekspłuatacyi transpartnaha srodku, što vyjaviłasia ŭ raźmiaščeńni nie praduhledžanaj PDR naklejki na zadnim škle aŭtamabila.
«21 žniŭnia ŭ dačynieńni da nazvanaha vadziciela składzieny pratakoł ab administracyjnym pravaparušeńni zhodna z č. 3 art. 18.12 KoAP. Jon aštrafavany na 90 tys. rubloŭ», — paviedamiŭ Śmirnoŭ.
Pavodle p. 194.13 praviłaŭ darožnaha ruchu zabaraniajecca ŭdzieł u darožnym ruchu transpartnaha srodku sa źniešnie bačnymi naklejkami (vyjavami), akramia tych, što raźmiaščajucca va ŭstanoŭlenym paradku, apaznavalnych znakaŭ transpartnych srodkaŭ, dazvołu na dopusk transpartnaha srodku da ŭdziełu ŭ darožnym ruchu, rekłamy, infarmacyi ab prynaležnaści transpartnaha srodku adpaviednaj arhanizacyi (indyvidualnamu pradprymalniku).
