Ekanamist Viktar Ciareščanka, jaki vyłučaŭsia ŭ prezidenty, ličyć, što ŭłady chočuć zapałochać jaho jak «adzinaha apazicyjnaha kandydata». Tak jon prakamientavaŭ zajavu CVK ab tym, što z 130 tysiač padadzienych jaho inicyjatyŭnaj hrupaj podpisaŭ mienš siami tysiač pryznana sapraŭdnymi.
BiełaPAN
«Mohuć i tysiaču napisać. My źbirali, jak mahli, u ramkach zakanadaŭstva. Padvoch adbyŭsia abo ŭ kamisijach, ci kali vieźli kaardynatary, ci jašče niedzie — ja skazać nie mahu», — zajaviŭ Ciareščanka.
Ekanamist abviarhaje abvinavačvańni, jakija hučali ŭ ŚMI, ab tym, što dadzienyja ŭ jaho padpisnych listach byli razdrukavanyja na pryntary: «My razdrukoŭvali tolki šapku na pryntary. Usio astatniaje zapaŭniałasia rukoj, jak zakon i patrabuje». Ciareščanka skazaŭ, što asabista jeździŭ pa rehijonach i bačyŭ svaje padpisnyja listy.
«Jany chočuć zapałochać mianie, adzinaha apazicyjnaha kandydata, a ja siońnia adziny apanient», — zajaviŭ Ciareščanka.
Pa słovach surazmoŭcy, jon nikoli «nie klikaŭ na płošču, a zaŭsiody sprabavaŭ kanstruktyŭna danieści da ŭłady svaje idei pra ekanomiku». «Treba źmianić fieadalnuju sistemu kiravańnia ŭ krainie, kuča prablem, spyniajucca pradpryjemstvy, manietarnaja palityka nijakaja», — dadaŭ Ciareščanka.
«Mianie ŭžo heta nie cikavić, ja admaŭlajusia ad hetych vybaraŭ, ad hetaha cyrka. Zdaroŭje daražej.
A fieadalnaja sistema doŭha nie praisnuje. Nu nielha tak dalej žyć u centry Jeŭropy», — skazaŭ jon.
Nahadajem, ciapier ekanamist znachodzicca ŭ špitali paśla taho, jak miarkujecca, atruciŭsia markoŭnym sokam ŭ minskim kafe 28 žniŭnia.
Pa apošnich dadzienych CVK, tolki čaćviora pretendentaŭ na prezidenckuju pasadu majuć šancy na rehistracyju kandydatami. Heta Alaksandr Łukašenka, Siarhiej Hajdukievič, Mikałaj Ułachovič i Taćciana Karatkievič.
Ciareščanka adznačyŭ, što pačuvajecca drenna. Pavodle jaho słoŭ, pakul dyjahnazu niama, spačatku daktary padazravali alerhiju, ale «ja užo tut čaćviora sutak, a alerhija prachodzić za sutki pad kropielnicaj».
