Valutnaja vyručka Biełarusi ŭ studzieni—lipieni 2015 hoda skłała mienš čym 20 młrd. dołaraŭ i źniziłasia ŭ paraŭnańni z anałahičnym pieryjadam minułaha hoda amal na čverć.
Pavodle źviestak BiełaPAN, valutnyja pastupleńni Biełarusi skłali ŭ studzieni—lipieni 19,8 młrd. dołaraŭ i skaracilisia ŭ paraŭnańni z anałahičnym pieryjadam 2014 hoda na 5,88 młrd. dołaraŭ.
Skaračeńnie valutnaj vyručki sioleta abumoŭlenaje źnižeńniem ekspartu biełaruskich tavaraŭ i pasłuh, a taksama pastupleńniaŭ ad unutranaha handlu za valutu.
Tak, ekspart biełaruskich tavaraŭ prynios u studzieni—lipieni valutnuju vyručku ŭ 15,8 młrd. dołaraŭ. U paraŭnańni sa studzieniem—lipieniem 2014 hoda vyručka Biełarusi ad ekspartu tavaraŭ źniziłasia na 4,9 młrd. dołaraŭ.
Pastupleńni ad ekspartu pasłuh u studzieni—lipieni skłali 3,5 młrd. dołaraŭ i skaracilisia ŭ paraŭnańni z anałahičnym pieryjadam minułaha hoda na 641,9 młn. dołaraŭ.
Varta zaznačyć, što sioleta rezka skaracilisia valutnyja pastupleńni ad unutranaha handlu za valutu.
U studzieni—lipieni jany skłali 16,9 młn. dołaraŭ i źnizilisia ŭ paraŭnańni z anałahičnym pieryjadam minułaha hoda bolš čym u 20 razoŭ.
Skaračeńnie pastupleńniaŭ ad unutranaha handlu za valutu analityki finansavaha rynku tłumačać palitykaj Nacbanka pa dedałaryzacyi ekanomiki. Nahadajem, u sakaviku hetaha hoda rehulatar zabaraniŭ vykarystańnie raźlikaŭ u zamiežnaj valucie za turystyčnyja i strachavyja pasłuhi. Adnačasova z hetym była ŭstanoŭlenaja zabarona na raźliki ŭ SKV za paliva na aŭtazapravačnych stancyjach.
U toj ža čas skaračeńnie valutnych pastupleńniaŭ Biełarusi ad ekspartu tavaraŭ i pasłuh ekanamisty tłumačać źnižeńniem popytu ŭ Rasii na tavary biełaruskaj vytvorčaści.
Zhodna sa źviestkami za studzień—lipień, valutnyja pastupleńni Biełarusi z Rasii skłali 7,4 młrd. dołaraŭ i źnizilisia ŭ paraŭnańni z anałahičnym pieryjadam minułaha hoda na 3 młrd. dołaraŭ. Pry hetym pastupleńni ad ekspartu tavaraŭ z Rasii skłali 5,88 młrd. dołaraŭ i źnizilisia na 2,5 młrd. dołaraŭ. Valutnaja vyručka Biełarusi ad ekspartu pasłuh u Rasiju skłała ŭ studzieni—lipieni 1,35 młrd. dołaraŭ i źniziłasia ŭ paraŭnańni z anałahičnym pieryjadam 2014 hoda amal na paŭmiljarda dołaraŭ.
