Fota z sajta 111pix.com.ua
U parku Paŭłava, što kala mietro «Malinaŭka», adkryjecca najvialikšaja ŭ stalicy placoŭka dla indyvidualnych i masavych trenirovak, paviedamlaje inicyjatar prajektu, kampanija «Koka-Koła Bieŭrydžys Biełaruś».
Adnačasova na placoŭcy zajmacca zmohuć da 40 čałaviek, jość turniki, brusy, rukachody, łaŭki, šviedskija ścienki, łaŭki dla presu, źmiejepadobnaja pierakładzina, roznaŭzroŭnievyja turniki dla skačkoŭ ź pierachopam.
Takaja placoŭka kaštavała kala 1,3 młrd biełaruskich rubloŭ. Na joj možna pravodzić i prymać nacyjanalnyja i mižnarodnyja spabornictvy pa Street Workout.
Adkryćcio adbudziecca na Dzień horada, na cyrymonii vystupiać varkaŭt-kamandy, buduć zładžanyja spartyŭnyja konkursy i majstar-kłas Maksima Truchanoŭca, suśvietnaha rekardsmiena pa «vychadach siłaj na dźvie ruki», a taksama vystup hurtu Litesound.
Placoŭka ŭ Malinaŭcy — nie adzinaja ŭ Minsku. Tolki za minuły hod i tolki ŭ prahramie «Koka-Koły» ŭ Minsku było adkryta piać sučasnych placovak (u parkach «Civali» i Marata Kazieja), taksama źjavilisia placoŭki ŭ Smarhoni, Babrujsku i ŭ dziciačym azdaraŭlenčym centry «Zubrania».
Adrasy ŭsich placovak dla Street Workout u Minsku sprabujuć sabrać, naprykład, tut, a nie tak daŭno hid pa placoŭkach dla varkaŭtu skłaŭ Citydog. Ź inšaha boku, zajmacca Street Workout možna i na starych savieckich «žaleznych haradkach», što jość u mnohich dvarach — aby było žadańnie.
