Teatr junaha hledača 1 červienia viarnuŭsia ŭ «rodny» budynak pa adrasie Enhielsa, 26. Abnoŭlenaja scena adkryłasia paśla šaści siezonaŭ restaŭracyi. Dyrektar teatra Ihar Varonin raskazvaje pra novy etap raźvićcia teatra z pačatkam novaha, 60-ha siezona.
U novaj zale 323 miescy — tolki kryšku mienš, čym było. Budynak teatra zachavaŭ svoj źniešni vyhlad, ale abnoŭleny ŭsiaredzinie. Repiertuar TIUH choča zapoŭnić tvorami sučasnych biełaruskich aŭtaraŭ, ad małych śpiektaklaŭ syści da maštabnych i šmathapłanavych.
Akramia abnoŭlenaha hałoŭnaha budynka teatr atrymaŭ i novy administracyjna-vytvorčy kompleks, novyja asobnyja bufiety dla hledačoŭ i supracoŭnikaŭ.
Na druhim paviersie teatra zapracuje muzyčnaja haścioŭnia, dzie pierad śpiektaklem i ŭ antraktach buduć hrać maładyja muzyki z kaledža Hlinki i inšych navučalnych ustanoŭ. U bakavych faje buduć pravodzicca ekspazicyi dziciačych malunkaŭ, u tym liku pa matyvach pabačanych dziećmi śpiektaklaŭ.
Razam z tym teatr płanuje zapuścić na adnym z telekanałaŭ adukacyjna-vychavaŭčuju prahramu pra teatr, ułasnyja prajekty «Zdaroŭje i kultura» i «Čatyry siezony».
Teatr junaha hledača 6 siezonaŭ žyŭ u ścisnutych umovach, śćviardžaje mastacki kiraŭnik Uładzimir Savicki, ad čaho paciarpieła jak jakaść i maštab śpiektaklaŭ, tak i ŭłasna trupa.
Pavodle jaho słoŭ, teatr straciŭ pakaleńnie hledača: mnohija i nie viedajuć, dzie teatr znachodzicca. Ciapier asnoŭnaja zadača, jak by to banalna nie hučała, stvareńnie vysokajakasnych śpiektaklaŭ jak dla samaj maładoj aŭdytoryi, tak i dla padletkaŭ. Teatr spadziajecca pavialičyć maštab śpiektaklaŭ i ich mnahapłanavaść, ładzić śpiektakli, u jakich budzie zadziejničany praktyčna ŭvieś piersanał i novyja mahčymaści sceny.
Z teatra sioleta źniali patrabavańnie pa zapaŭnialnaści zali, dyrekcyja spadiajecca, što taki paramietr nie vierniecca i ŭ nastupnyja hady.
Mastacki kiraŭnik spadziajecca, što dzieci i baćki buduć iści na śpiektakli pa ŭłasnym žadańni (i z asałodaj), a nie zahaniacca škołami. Taksama, jak adznačaje dyrektar, teatr chacieŭ by pryvabić navučencaŭ praftechvučelniaŭ — redkich haściej teatraŭ.
Bałazie, śpiektakli teatra zaŭsiody zapatrabavanyja. Biełaruskaja mova (a na joj pastaŭlenyja amal usie śpiektakli) nie vyklikaje nierazumieńnia baćkoŭ ci dziaciej.
Da taho ž, u teatry prydumali srodki dla znajomstva dziaciej z teatralnaj movaj, vydali admysłovy słoŭničak dla tych, chto ŭpieršyniu trapiŭ u biełaruski teatr.
A sastarełyja ci niezvyčajnyja słovy, što pasujuć śpiektaklam pa atmaśfiery i hučańni, ale mohuć być nieznajomyja hledaču, «zapakavanyja» ŭ taki kantekst, dzie nie mohuć być niezrazumiełymi. Dla haściej z zamiežža teatr moža vykarystoŭvać i biahučy radok ź pierakładam.
Novy, užo 60-y siezon u historyi teatra, adkryjecca «Siniaj ptuškaj» Marysa Mieterlinka. Režysior-pastanoŭščyk — Uładzimir Savicki.
«Siniaja ptuška» raźličanaja na hledača ad 10 hod, ale, jak ličyć dyrektar teatra, moža być zrazumiełaja i cikavaja i maładziejšamu hledaču.
Nadalej u afišy — «Zaciukany apostał», «Daroha na Viflijem», «Careŭna-žabka», «Krychu piaščoty», «Tedzi», «Šytaja lalka Rehiedzi En» i «Kot u botach». Teatr dzielić repiertuar na śpiektakli dla samych maleńkich, «cudoŭnyja historyi i kazki» dla starejšaj aŭdytoryi i davoli darosłyja viečarovyja pakazy, niekatoryja ź jakich raźličanyja na ŭzrost ad 18 hod (apošnich pakul tolki piać — teatru chaciełasia b bolš).
Da novaha hoda płanujecca siarod inšaha «Čaraŭnik Izumrudnaha horada», paśla — «Don Kichot» pavodle Bułhakava, u krasaviku-mai — «Dzikaje palavańnie karala Stacha». Całkam pabačyć afišu možna na sajcie teatra.
U prahramie mahła b źjavicca i «Calanačka», ale śpiektakl aryjentavany na miechanizacyju, što nie atrymałasia «prašturchnuć» u rekanstrukcyju. Mahčyma, śpiektakl źjavicca na scenie, ale ŭ pierapracavanym varyjancie. Mahčyma, u arsienale teatra ŭ chutkim časie źjavicca i muzyčny śpiektakl, amal miuzikł pavodle kazki «Žabki i čarapacha» Uładzimira Karatkieviča. «Siniaja ptuška» ž zadziejničaje mahčymaści miechanizacyi i samoj trupy pa maksimumu.
Štatnaja struktura tym časam patrabuje papaŭnieńnia. Na siońnia ŭ teatry pracujuć 217 čałaviek, ź ich 45 akcioraŭ. Dyrekcyja spadziajecca pavialičyć štat jašče na dva dziasiatki čałaviek, u tym liku šukaje maładych akcioraŭ. Patrebnyja i śpiecyjalisty pa videaadlustravańni, ale takich u Biełarusi mała i teatralnaj zarpłataj zacikavić ich ciažka. Zaprošanyja režysiory buduć źjaŭlacca ŭ teatry, ale dyrekcyja najpierš choča zaprašać majstroŭ, jakija zmohuć nie tolki pastavić śpiektakli, ale i pravieści svajeasablivyja majstar-kłasy dla akcioraŭ. Teatr chacieŭ by mieć sponsarskija prahramy, ale, jak adznačaje dyrektar, jość ciažkaści: bahatyja kampanii ŭžo majuć padapiečnych.
