Patencyjny kandydat u prezidenty, ataman biełaruskaha kazactva Mikałaj Ułachovič ŭ intervju Naviny.by raskazaŭ, čamu vyrašyŭ udzielničać u vybarach prezidenta, ci hatovaja jaho partyja padtrymać Karatkievič i chto finansuje jaho pieradvybarčuju kampaniju.
— Mikałaj Dźmitryjevič, na sajcie kazak.by pakazana, što ŭ vas try vyšejšyja adukacyi - techničnaja, vajskovaja i humanitarnaja. Raskažycie, dzie vy vučylisia.
— U 1969 hodzie ja skončyŭ u Minsku architekturna-budaŭničy technikum. U 1974 hodzie — Simfieropalskaje vyšejšaje vajskovaje vučylišča, u mianie dypłom palitołaha. U 1982-m — histaryčny fakultet Ivanaŭskaha dziaržaŭnaha univiersiteta. A praz 10 hadoŭ jašče i Vałhahradski inžynierna-budaŭničy instytut.
— Vy tak doŭha šukali siabie?
— A što ŭ hetym drennaha? U mianie praca była takaja. Ja nie zachacieŭ iści ŭ vyšejšuju partyjnuju škołu, a ad mianie patrabavałasia humanitarnuju adukacyju, tamu i pajšoŭ na histaryčny. Ja ž u 19 hadoŭ pryjšoŭ u partyju. Śviadoma. Z honaram atrymlivaŭ partbilet.
— Apošnija hady vy šmat kažacie ab pravasłaŭi. Kali vy byli siabram KPSS, to kali pryjšli da viery?
— Ja achryščany čałaviek. Ale kali ŭstupaŭ u partyju, viadoma, mała što viedaŭ pra vieru. Ja pryjšoŭ da hetaha značna paźniej. Ničoha ŭ hetym dziŭnaha niama. Moj siabar ajciec Ihar (Karastyloŭ) (z 2002 hoda źjaŭlajecca duchoŭnikam «Biełaruskaha kazactva». - Naviny.by) paśla instytuta pryjšoŭ da viery! My ź im, darečy, vučylisia ŭ architekturna-budaŭničym technikumie ŭ Minsku.
— Vy viarnulisia ŭ Biełaruś, nakolki ja razumieju, u 90-ch, kali syšli ŭ zapas. I praktyčna adrazu, u 1994-m, byli pryznačanyja načalnikam hałoŭnaha ŭpraŭleńnia kapitalnaha budaŭnictva Kiraŭnictva spravami prezidenta. Čym možacie rastłumačyć karjerny ŭźlot?
— Pa-pieršaje, z 1992-ha pa 1994-y ja pracavaŭ hałoŭnym inžynieram žyllova-kamunalnaha adździeła Minskaha traktarnaha zavoda. U mianie było 1200 čałaviek u padnačaleńni! Pa-druhoje, da hetaha ja ŭznačalvaŭ bujnyja budoŭli pa ŭsim Sajuzie, u mianie ŭ padparadkavańni było 17,5 tysiačy vajskoŭcaŭ. Tak što ničoha dziŭnaha ŭ maim pryznačeńni niama.
— Čamu ž vy syšli z hetaj pasady litaralna praz hod?
— Ja nie pajšoŭ, mianie pryznačyli hienieralnym dyrektaram dziaržaŭnaha pradpryjemstva pa nieruchomaści.
— Davajcie pahavorym ab vašaj partyi. Kolki ciapier členaŭ u Biełaruskaj patryjatyčnaj partyi?
— U pryncypie, heta nie sakret - 1,5 tysiačy čałaviek. Naša partyja pieršapačatkova stvarałasia pad kandydata ŭ prezidenty Alaksandra Łukašenki. My zaŭsiody pradstaŭlali jaho prykładna jak «Adzinaja Rasija» Pucina.
— Čamu ž na hetych vybarach vy vyrašyli vystavić svaju kandydaturu, a nie padtrymać Łukašenku?
— Ja vykonvaju svoj kanstytucyjny abaviazak! Kožny biełarus pavinien udzielničać u vybarach, tamu ja vyrašyŭ bałatavacca.
— Ale čamu mienavita ŭ hetym hodzie? Raniej vas Łukašenka zadavalniaŭ?
— Vy tak stavicie pytańnie … A vas što, Łukašenka nie zadavalniaje?
— Na hetych vybarach jon dla vas kankurent.
— Ja b tak nie kazaŭ, jon nie zusim kankurent. My ŭsie budziem kankurentami na hetych vybarach - i Karatkievič, i Hajdukievič, i Łukašenka, i ja. Kaho zarehistrujuć, toj i budzie kankurentam.
— Vy ŭsio-taki nie adkazali, što zdaryłasia ŭ hetym hodzie, što vy vyrašyli vyłučyć svaju kandydaturu.
— Usio źmianiłasia. U mianie źjaviłasia mahčymaść.
— Finansavaja?
— Čamu abaviazkova finansavaja? U mianie čas volny źjaviŭsia. Ja staŭ volnym.
— Vy ž tolki stali namieśnikam staršyni praŭleńnia Minskaha abłspažyŭsajuza. I ŭ vas źjaviłasia volny čas?
— Kali b vy viedali, jak ja raniej byŭ zahružany. Ja ž nie raspaviadaŭ nikoli, kolki ŭ mianie ludziej było ŭ padparadkavańni, na budoŭlach.
— Adna z metaŭ vašaj partyi, pavodle źviestak ab dziaržrehistracyi, - «padtrymka prezidenta ŭ jaho imknieńni pa vykanańni pieradvybarnaj prahramy». Kali na vybarach pieramoža, da prykładu, Karatkievič, vy budziecie joj dapamahać?
— Toje, što stavicca ŭ metach partyi - heta adno, a dziejańni - inšaje. I potym, partyja kali stvarałasia? Daŭno, u 1994 hodzie. My možam pierahledzieć hety punkt.
— Vy znajomyja asabista z Łukašenkam?
— Nu, pa televizary baču jaho. A tak … Viadoma, u 90-ch my pierasiakalisia pa pracoŭnych pytańniach, na ahitacyjnych mierapryjemstvach. U apošni čas my nie sustrakalisia. Ale ŭ partyi, viadoma, jość padziačnyja listy ad prezidenta.
— Vašyja byłyja paplečniki kažuć, što ŭ 2010 hodzie vy prymušali kazakoŭ ŭstupać u Biełaruskuju patryjatyčnuju partyju. Heta tak?
— Tak, ja zaklikaŭ, i mnohija kazaki ŭstupili ŭ partyju. Ale ja nie prymušaŭ.
— A sabrać z kožnaha kazaka pa 1 młn rubloŭ zahadvali? Pra heta taksama raspaviadajuć vašyja byłyja paplečniki …
— Heta byli dobraachvotnyja achviaravańni: chto 100 tysiač daść, chto 5000. Heta było na 15-hodździe «Biełaruskaha kazactva», surjoznaja data. Arhanizacyja bo žyvie za košt členskich uznosaŭ, sponsarskaj dapamohi.
— Vašu pieradvybarčuju kampaniju taksama finansujuć kazaki?
— U asnoŭnym, tak. Miecenata ŭ mianie niama. A kali b i byŭ, ja b vam pra heta nie skazaŭ. Ja sam finansuju svaju kampaniju. U mianie dobraja piensija, vajskovaja.
— I jaki abjom finansavańnia?
— Nie chaču kazać.
— Isnuje mierkavańnie, što vas i jašče niekalki kandydataŭ vykarystoŭvajuć dla lehitymizacyi vybaraŭ u Biełarusi.
— Ja z hetym nie zhodny. Kali b inšyja byli kandydaty, taksama samaje kazali b.
— U 2010 hodzie situacyja była ŭsio-tki inšaja.
— I što? Ja asabista viedaju Statkieviča, ja ź im za adnym stałom siadzieŭ, abmiarkoŭvali vybary. Toje samaje było ŭ 2010-m.
(Statkievič u kamientary Naviny.by zajaviŭ, što nikoli nie sustrakaŭsia z Ułachovičam.)
— Vy byli rady, što Statkieviča vyzvalili?
— Viadoma, ja byŭ rady. Nie tolki za jaho, ale i za inšych, jakich vyzvalili.
— Statkievič - mocny palityk?
- Ja skončyŭ palitałohiju, a jon nie skončyŭ … Ja nie mahu skazać, chto jon.
— Paśla zakančeńnia vybaraŭ raźličvajecie vy na pracu ŭ kamandzie Łukašenki. Moža, bačycie siabie va ŭradzie?
— Ja baču siabie va ŭradzie na troch pasadach, ale jany zaraz zaniatyja. Ja nie budu zhadžacca na lubuju prapanovu. U mianie ŭžo była pasada ŭzroŭniu namieśnik ministra. Tamu zaraz ja b pajšoŭ tolki na peŭnuju pracu, ale pakul mianie va ŭrad nie klikali.
Daviedka Naviny.by
Mikałaj Ułachovič naradziŭsia ŭ 1951 h. u Minsku. Pałkoŭnik u adstaŭcy, nazyvaje siabie «narodnym hienierałam». Staršynia Biełaruskaj patryjatyčnaj partyi i viarchoŭny ataman RHA «Biełaruskaje kazactva». Vydavaŭ hazietu «Asoba» (1996-1999). Pracavaŭ hałoŭnym inžynieram adździeła ŽKH na Minskim traktarnym zavodzie (1992-1994), načalnikam hałoŭnaha ŭpraŭleńnia kapitalnaha budaŭnictva Kiraŭnictva spravami prezidenta (1994-1995), hiendyrektaram Respublikanskaha centra ŭliku i rehistracyi nieruchomaści, hałoŭnym inžynieram SP «Prameks» (2013-2014), viadučym inžynieram u Minskim abłspažyŭsajuzie (2014-2015). Z červienia 2015 h. - namieśnik staršyni praŭleńnia Minskaha abłspažyŭsajuza. Žanaty, dvoje dziaciej.
