Zapusk rakiety ź pieršym u historyi Kitaja miesiacachodam «Niefrytavy zajac», 2 śniežnia 2013 hoda. Fota sajta cnn.com
Kitaj źbirajecca stać pieršaj krainaj, jakaja vysadzić kaśmičny zond na advarotnym baku Miesiaca, paviedamlaje ahienctva Xinhua. Miarkujecca, što apieracyja budzie vykanana z dapamohaj zonda «Čan'e-4», jaki płanujecca zapuścić da 2020 hoda.
Udzielnik miesiacovaj prahramy Kitajskaj akademii navuk Czou Junlao paviedamiŭ, što apošnija 12 ź lišnim miesiacaŭ ekśpierty aceńvali mahčymaść ažyćciavić zadumanaje paśla rasparadžeńnia ŭrada.
Advarotny, abo «ciomny», bok Miesiaca, jak jaho časta nazyvajuć, niemahčyma ŭbačyć ź Ziamli. Pa słovach Czou, hety bok ŭjaŭlaje idealnuju placoŭku dla vyvučeńnia nizkačastotnych radyjochval.
Czou taksama dadaŭ, što zond «Čan'e-4» pa svajoj kanstrukcyi vielmi padobny da «Čan'e-3», adnak zdolny nieści bolš karysnaj nahruzki. Zond budzie vykarystany dla vyvučeńnia hieałahičnych asablivaściaŭ advarotnaha boku Miesiaca.
«Čan'e-3» pryziamliŭsia na miesiacovaj pavierchni ŭ 2013 hodzie, dziakujučy hetaj apieracyi Kitaj staŭ treciaj krainaj paśla ZŠA i SSSR, jakaja zdoleła paśpiachova ździejśnić miakkuju pasadku kaśmičnaha aparata na Miesiacy.
Kitajskaja prahrama pa vyvučeńni Miesiaca padzielena na try etapy. U chodzie pieršaha byli zapuščanyja miesiacovyja arbitalnyja zondy «Čan'e-1» (2007) i «Čan'e-2» (2010 hod). U vyniku była składziena trochmiernaja karta pavierchni Miesiaca z vysokim razroźnieńniem, sfatahrafavanyja i vyznačanyja rajony, dzie mierkavałasia ažyćciavić pasadku nastupnych aparataŭ.
Miesiacachod «Niefrytavy zajac». Fota sajta cnn.com
Na druhim etapie ŭ 2013 hodzie byŭ zapuščany «Čan'e-3», jaki dastaviŭ na pavierchniu Miesiaca samachodny aparat «Jujtu» («Niefrytavy zajac»). A palot, jaki zaraz maje skončycca, aparata «Čan'e-5T1» ŭ 2014 hodzie staŭ padrychtoŭkaj da realizacyi treciaha etapu kitajskaj prahramy pa vyvučeńni Miesiaca.
