«Tym, chto akazaŭsia nie hatovy da pracy ŭ novych umovach, chaciełasia b nahadać, što valutnaje zakanadaŭstva Respubliki Biełaruś nie ŭtrymlivaje abmiežavańniaŭ dla vizavych centraŭ na kuplu zamiežnaj valuty dla vykanańnia svaich abaviazacielstvaŭ pierad zamiežnymi pasolstvami. Heta značyć, nijakich abjektyŭnych pieraškodaŭ dla paŭnavartasnaj pracy dadzienych jurydyčnych asob siońnia niama», — zajaviŭ načalnik hałoŭnaha ŭpraŭleńnia valutnaha rehulavańnia i valutnaha kantrolu Nacyjanalnaha banka Anatol Maroz, kamientujučy infarmacyju ab prypynieńni vizavymi centrami pryjomu dakumientaŭ na afarmleńnie viz ad nasielnictva paśla ŭstupleńnia ŭ siłu pastanovy rehulatara №515.
Kiraŭnik hałoŭnaha ŭpraŭleńnia źviarnuŭ uvahu, što da ŭstupleńnia ŭ siłu pastanovy №515 vizavyja centry ŭstaloŭvali košty na svaje pasłuhi ŭ zamiežnaj valucie, ale z apłataj biełaruskimi rublami pa kursie na datu apłaty. Pry hetym płata niepasredna za vizy brałasia tolki ŭ zamiežnaj valucie. «Razam z tym varta padkreślić, što zhodna z artykułam 141 Hramadzianskaha kodeksa biełaruski rubiel źjaŭlajecca zakonnym płaciežnym srodkam, abaviazkovym da pryjomu pa naminalnym košcie na ŭsioj terytoryi Biełarusi. Heta aznačaje, što vizavyja centry i raniej — da ŭstupleńnia ŭ siłu pastanovy №515 — pavinny byli praduhledžvać mahčymaść apłaty za vizy jak u zamiežnaj valucie, tak i ŭ biełaruskich rublach», — kanstatavaŭ Anatol Maroz. Kali b hety padychod vykonvaŭsia, upeŭnieny jon, nijakich ciažkaściaŭ ź pierachodam da novych praviłach pracy ni ŭ kaho nie ŭźnikła b.
Niadaŭniaj pastanovaj NB RB z 16 vieraśnia skasavana mahčymaść pryjomu jurydyčnymi asobami ad fizičnych asob zamiežnaj valuty dla apłaty konsulskich i inšych zboraŭ pry afarmleńni dakumientaŭ, nieabchodnych dla vyjezdu za miažu. Pry hetym zachavana mahčymaść pryjomu zamiežnaj valuty ad fizičnych asob niepasredna dypłamatyčnymi i inšymi aficyjnymi pradstaŭnictvami zamiežnych dziaržaŭ.
