Vajskoŭcy Uschodniaj vajennaj akruhi nie nakiroŭvalisia ŭ Siryju, jaho padraździaleńni pieramiaščajucca ŭ płanavym paradku tolki ŭ miežach UVA, zajavili ŭ pres-słužbie akruhi.
«Va Uschodniaj vajennaj akruzie ździŭlenyja sprobami karespandentaŭ internet-vydańnia pryviazać paŭsiadzionnuju dziejnaść padparadkavanych vojskaŭ da padziej na Blizkim Uschodzie. Pieramiaščeńni voinskich čaściej i padraździaleńniaŭ vajennaj akruhi ŭ ramkach mierapryjemstvaŭ bajavoj padrychtoŭki ažyćciaŭlajucca ŭ płanavym paradku vyklučna ŭ miežach Uschodniaj vajennaj akruhi», — skazali pradstaŭniki vajskoŭcaŭ.
Raniej rasijskaje vydańnie «Hazieta.ru» apublikavała śviedčańni nienazvanych vajennych, jakija śćviardžajuć, što ich u terminovym paradku pierakidvajuć ŭ Siryju, pry hetym piśmovych zahadaŭ pra heta jany nie bačyli, a pradstaŭnik Hienštaba, jaki vystupaŭ pierad imi ŭ častcy, zajaviŭ, što zahad ab kamandziroŭcy sakretny.
Člen Savieta pa pravach čałavieka Siarhiej Kryvienka raspavioŭ bbcrussian, što ŭ SPČ pastupiła ŭžo niekalki zapytaŭ ad vajennych i ich svajakoŭ, jakich kamandavańnie rychtuje da kamandzirovak u niejkuju haračuju krainu. Adzin ź ich i byŭ nakiravany ŭ minabarony.
U SPČ nastojvajuć, što kali infarmacyja, jakaja źmiaščajecca ŭ zvarotach, słušnaja, to adpraŭka vajennych pravodzicca z parušeńniem zakona.
«Prezident Rasii maje poŭnaje prava ŭ adpaviednaści ź mižnarodnymi damovami adpraŭlać u inšyja krainy vajenny kantynhient dla padtrymańnia miru i biaśpieki, ale treba vykonvać praduhledžanuju zakonam praceduru», — rastłumačyŭ Kryvienka.
