U repartažy Eŭraradyjo z katedžu Hajdukieviča toj pryznajecca žurnalistu Źmitru Łukašuku, što nabyŭ učastak z domam u 93-m hodzie za 22 tysiačy dalaraŭ.
«Na maju zaŭvahu, što 22 tysiačy dalaraŭ u 1993 hodzie byli vializnaj sumaj, — piša Łukašuk, — spakojna adkazvaje, što «ŭ tyja časy adzin šapik prynosiŭ za dzień tysiačy try prybytku, nia toje što ciapier, tamu nie takaja heta i vialikaja suma».
22 tysiačy dalaraŭ u 1993 hodzie nie byli ni vialikaj, ni navat vializnaj sumaj. U toj čas jany byli sumaj kalasalnaj.
Kali ja padzialiŭsia svaimi sumnieńniami ŭ fejsbuku, atrymaŭ kamentar: «Poŭnaściu z vami zhodny, bo ŭ mianie byŭ zarobak $23 j pracavaŭ ja na «Intehrale» inžyneram, a zarobki tam byli nie na apošnim miescy j suma ŭ $22 tys. vyhladała kaśmičnaju». U listapadzie 1992-ha ŭ znak pratestu suprać zabarony Viarchoŭnym Savietam inicyjavanaha BNF referendumu ab daterminovych vybarach ja syšoŭ z pasady sakratara parlamenckaj kamisii pa ŚMI i pravach čałavieka (pieršaja dobraachvotnaja palityčnaja adstaŭka ŭ novaj Biełarusi). Na toj momant maja zarpłata była až 40 dalaraŭ. Pasada sakratara kamisii pa zarpłacie pryraŭnoŭvałasia da ministerskaj, takim čynam, u ministra byli tyja ž 40 dalaraŭ. Potym zarobak krychu padniali, ale nie našmat —
u tym ža 1993 staršynia VS Šuškievič atrymlivaŭ u ekvivalencie 80 dalaraŭ, staršynia Saŭminu Kiebič — aficyjna — krychu mieniej.
U 1993 hodzie Hajdukievič pracavaŭ v.a načalnika Ŭpraŭleńnia pry Saviecie Ministraŭ pa sacyjalnaj abaronie vajskoŭcaŭ, asobaŭ šarahovaha i kiroŭnaha składu orhanaŭ unutranych spraŭ, vajskoŭcaŭ-internacyjanalistaŭ, zvolnienych u zapas u (adstaŭku) i členaŭ ich siemjaŭ. Pasada pryraŭnoŭvałasia, u lepšym vypadku, da namieśnika ministra.
(U dužkach zaŭvažu, što heta aficyjnaja pasada, realna ž Hajdukievič uznačalvaŭ prakiebičaŭskaje «Narodnoje dvižienije Biełarusi», jakoje było stvorana dla supraćstajańnia z BNF i vystupała za abjadnańnie Biełarusi i Rasiei. Šmatlikija vystupy Hajdukieviča ŭ dziaržaŭnych ŚMI vyznačalisia ahresiŭnym nieprymańniem Niezaležnaści, nacyjanalnaha Adradžeńnia, biełaruskaj movy, demakratyčnych kaštoŭnaściaŭ.)
Naturalna, zarpłata v.a. načalnika ŭpraŭleńnia pry Saviecie Ministraŭ nijak nie mahła być bolšaj za zarobak staršyni Savietu Ministraŭ.
Darečy, nijaki šapik u 1993 hodzie pry siarednim zarobku ŭ 20 dalaraŭ nie «prynosiŭ za dzień tysiačy 3 prybytku». Da nas pastajanna źviartalisia pradprymalniki sa skarhami na biurakratyčny cisk, tamu ja mahu ŭjavić ich dachod — dobra kali jon byŭ ŭ paŭtysiačy tych dalaraŭ za miesiac.
Uvohule, ci razumieje Hajdukievič, pra što śviedčać jahonyja słovy pra šapiki? Dziaržčynoŭnikam było zabaroniena zajmacca kamercyjnaj dziejnaściu.
Kaniečnie, šapiki tut ni pry čym. A voś udzieł u «karupcyjnych schiemach» — reeksparcie nafty, kalarovych metałaŭ i h.d. — davaŭ sapraŭdy hihancki prybytak.
Pamiataju, niejak ja pryvioŭ da adnaho z namieśnikaŭ Kiebiča staršyniu Čyhunačnaha rajvykankamu Viciebska (tam była maja vybarčaja akruha, a deputataŭ VS prapuskali biez čarhi), kab «vybić» kanalizacyjnyja truby. Pytańnie vyrašyłasia za try chviliny. «Ty viedaješ, kolki biznesoŭcy płaciać za uvachod u takija kabinety? — spytaŭ mianie staršynia rajvykankamu. — Staŭka pačynajecca ad troch tysiač dalaraŭ».
Heta Vasilu Bykavu Lavon Barščeŭski zavoziŭ miech bulby, bo nie chapała pensii, heta Zianon Paźniak atrymlivaŭ 20 dalaraŭ ŭ svaim Instytucie historyi Akademii Navuk i na sesiju VS jeździŭ na tralejbusie, a niekatoryja aktyŭna skałačvali padmurak ciapierašnich chołdynhaŭ i karparacyj.
Pačytajcie pryznańni ciapierašnich «hienerałaŭ biznesu», jakim ŭ 90-ch było 20—30 hadoŭ. Davali chabary i tym samym, tak ci inakš, umacoŭvali karupcyjnuju systemu, jakaja nie dazvoliła Biełarusi stać na demakratyčny, eŭrapiejski šlach. I jakaja, ź nievialikimi persanalnymi pieraturbacyjami, u 1994 pierajšła pad Łukašenku.
Zrešty, pra hety mechanizm nacyjanalnaj zdrady Biełaruski Narodny Front kazaŭ i tady.
«Daminujučym staŭ praces pieraraźmierkavańnia dziaržaŭnaj ułasnaści i finansaŭ u pryvatnuju ŭłasnaść namenklatury. Dla hetaha adpaviednym čynam napisany zakony, pryniaty šerah padzakonnych aktaŭ, jakija adčynili darohu niepravavomu, ale «zakonnamu» rabaŭnictvu dziaržaŭnaj majomaści, chabarnictvu i karupcyi. Usio heta adnačasna ź biezahladnaj palitykaj strymlivańnia i niedapuščeńnia rynkavych reformaŭ… pryviało da stvareńnia na Biełarusi asnovaŭ namenklaturna-mafijoznaj dziaržavy z typovaj dla jaje kancentracyjaj bahaćciaŭ u rukach vuzkaha koła kalaŭładnych asobaŭ, manapalizmam i imknieńniem da tatalitarnych formaŭ dziaržaŭnaha kiravańnia, što vyjaviłasia ŭ planach stvareńnia «prezydenckaj dyktatury».
Heta cytata z pramovy staršyni BNF Zianona Paźniaka na III Usiebiełaruskaj palityčnaj kanferencyi. 6 lipienia, toj samy 1993 hod.
