Mikoła Statkievič nie maje namieru iści 22 vieraśnia ŭ sud, dzie budzie razhladacca pratakoł ab administracyjnym pravaparušeńni, składzienym u dačynieńni da byłoha palitviaźnia 10 vieraśnia za arhanizacyju niesankcyjanavanaha pikieta kala staličnaha HUMa.
Pra heta Statkievič paviedamiŭ BiełaPAN 21 vieraśnia pa darozie z nacyjanalnaha aeraporta Minsk.
«Jedu z aeraporta i atrymlivaju SMS na telefon, što sud Centralnaha rajona Minska zaprašaje mianie ŭžo zaŭtra ŭ dziesiać hadzin ranicy na praces z nahody pratakołu, składzienaha na mianie 10 vieraśnia, — skazaŭ Statkievič. — Tam niama ni zvarotnaha telefona, ničoha. Padumaŭ, chakiery niejkija. Praz hadzinu atrymaŭ zvanok na mabilny telefon, pačynajuć kazać toje ž samaje. Ja kažu, što nie viedaju, chto vy taki, čaho ja tudy pajdu, tym bolš što i moj advakat na hetym tydni zaniaty. Da taho ž, pa zakonie, i terminy ŭstanoŭlenyja, za kolki dzion treba zaprašać u sud. Ja skazaŭ, što nie pryjdu, dasyłajcie pozvu. Kažuć, što dasłali, ale ja jaje nie atrymlivaŭ».
Na dumku Statkieviča, jaho vyklik u sud «zadumany, kab napałochać ludziej, jakija źbirajucca pryjści 23 vieraśnia na płošču Svabody na sustreču vybarščykaŭ». «Vidać, jany bajacca, što ŭzrovień strachu ŭ hramadstvie pamianšajecca, što pryjdzie šmat ludziej. Tamu jany vyrašyli spałochać, ale nie mianie, a ludziej. Ja nie bajusia, i vy nie bojciesia, kolki možna bajacca? Biez strachu žyć našmat zdaraviej i pryjemniej. Śmiešna spałochać mianie, paśla ŭsiaho taho, što było. Ja niadaŭna paličyŭ, što pravioŭ siem hadoŭ raznastajnych vidaŭ abmiežavańniaŭ, pačynajučy ad administracyjnych», — skazaŭ palityk.
Pozva na 22 vieraśnia pryjšła jašče adnamu ŭdzielniku pikietu 10 vieraśnia — lidaru arhkamiteta pa stvareńni hramadskaha ruchu «Za dziaržaŭnaść i niezaležnaść Biełarusi» Uładzimiru Niaklajevu. Adnak, pavodle źviestak BiełaPAN, Niaklajeva vyklikajuć da 11.00 nie ŭ sud, a va ŭpraŭleńnie ŭnutranych spraŭ Centralnaha rajona Minska. Ci pojdzie jon tudy, pakul nieviadoma.
Varta adznačyć, što abodva palityki tolki siońnia ŭviečary viarnulisia ŭ Biełaruś z-za miažy.
