Pryhavoram suda Kastryčnickaha rajona Mahilova asudžana 46-hadovaja mahilaŭčanka, raniej sudzimaja za zabojstva. Jana pryznanaja vinavataj u pryčynieńni ciažkaha cialesnaha paškodžańnia, h.zn. paškodžańnia, niebiaśpiečnaha dla žyćcia, naniesienaha asobaj, jakaja raniej učyniła zabojstvy (č. 3 art. 147 KK).
Jak paviedamiła staršy pamočnik prakurora Mahiloŭskaj vobłaści Ała Kuźniacova, vyzvaliŭšysia ź miescaŭ pazbaŭleńnia voli, abvinavačvanaja paznajomiłasia z mužčynam i stała žyć ź im u svajoj kvatery. U mai 2015 hoda jana z sužycielem pasvaryłasia, paśla čaho mužčyna biez dazvołu ŭziaŭ bankaŭskuju kartku abvinavačvanaj i źniaŭ ź jaje hrošy. Paśla vyśviatleńnia adnosin sužyciel paabiacaŭ viarnuć hrošy.
Na nastupny dzień paśla sumiesnaha ŭžyvańnia śpirtnoha žančyna stała paprakać pryjaciela ŭ tym, što jon biez dazvołu ŭziaŭ jaje hrošy. Na što toj, pažartavaŭšy, adkazaŭ siabroŭcy, što znajšoŭ inšuju žančynu, jakaja stavicca da jaho lepš, čym jana. U paryvie reŭnaści abvinavačvanaja, schapiŭšy sa stała kuchonny nož, naniesła im udar u śpinu sužycielu.
Sud pryznaŭ žančynu vinavataj va ŭčynienym złačynstvie. Akramia taho, jon pryznaŭ u jaje dziejańniach najaŭnaść asabliva niebiaśpiečnaha recydyvu.
U jakaści miery pakarańnia za ŭčynienaje sud pryznačyŭ abvinavačvanaj 11 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach strohaha režymu, a taksama prymianiŭ u dačynieńni da jaje prymusovaje lačeńnie ad ałkahalizmu pa miescy adbyvańnia pakarańnia.
