23 vieraśnia ŭ Minsku, u ofisie Abjadnanaj hramadzianskaj partyi (AHP), adbyłasia sustreča pradstaŭnikoŭ palityčnych i hramadska-palityčnych arhanizacyj dla vypracoŭki ahulnaj pazicyi pa pytańni raźmiaščeńnia zamiežnych vajennych baz u Biełarusi.
Juraś Hubarevič, pieršy namieśnik staršyni ruchu «Za Svabodu»: «Raźmiaščeńnie rasijskaj avijabazy na terytoryi Biełarusi niasie pahrozu našaj biaśpiecy. Na siońnia Rasija pryznanaja ŭ śviecie jak kraina-ahresar. Taki punkt na karcie Biełarusi moža być mišeńniu ŭ vypadku vyśpiavańnia kanfliktu pamiž Rasijaj i zachodnim śvietam».
Anatol Labiedźka, lidar AHP: «Ci jość takaja prablema na paradku dnia? Biezumoŭna! Jość pravavy składnik. U biełaruskaj Kanstytucyi zapisana vielmi dakładna, što my imkniemsia da taho, kab być biaźjadziernaj, pazabłokavaj krainaj. Heta značyć, što na terytoryi Biełarusi nie pavinna być vajennych baz.
Zaraz praktyčny aśpiekt. Apošnim časam źniešnija faktary istotna ŭpłyvajuć na situacyju ŭ Biełarusi. Heta źviazana z ukrainskimi padziejami. I my bačyli, jakuju rolu adyhryvali vajennyja bazy na terytoryi toj ci inšaj krainy. Jany źjaŭlalisia faktaram destabilizacyi. Tamu, kali my kažam pra biaśpieku Biełarusi, u hetaj situacyi lubaja zamiežnaja baza na terytoryi Biełarusi nie pavyšaje biaśpieku dla hramadzian, a, naadvarot, źmianšaje».
Uładzimir Niaklajeŭ, kiraŭnik stvaranaha hramadskaha ruchu «Za dziaržaŭnaść i niezaležnaść Biełarusi»: «Pryniaŭšy hetuju družalubnuju rasijskuju prapanovu, my całkam adychodzim pad jaje jak kałonija. Plus kałonija militaryzavanaja. Kałonija sa zbrojaj, i, vielmi mahčyma, zbrojaj jadziernaj. Tamu što pad kryłami rasijskich samalotaŭ vielmi prosta prylaciać jadziernyja bojehałoŭki».
Hladzicie taksama: Apazicyja kliča na schod u centry Minska suprać rasijskaj avijabazy
