«Sum i smutak naviavaje novieńki rejtynh najbujniejšych rasijskich kampanij RBK-500. My i raniej, viadoma, usio viedali pra syravinavy pierakos u ekanomicy i naftavuju zaležnaść, — piša rasijski palityk Alaksiej Navalny ŭ svaim błohu. —
Prosta tut usio tak nahladnieńka, choć płač.
Voś jany, kampanii, jakija składajuć asnovu ekanomiki RF:
Tut 77% VUP Rasii i ŭsiaho tolki 7,5 miljona zaniatych. Zaniataha nasielnictva ŭ krainie 71,1 młn čałaviek, atrymlivajecca tolki 10,5% zaniatych prynosiać 77% VUP. Žachliva.
Davajcie hruba vyłučym naftu, haz, mietały, hornuju spravu. Heta značyć usio toje, dzie my zarablajem, vykopvajučy ź ziamli niešta karysnaje i pradajučy jaho za miažu:
Ujavicie, što zaŭtra naftu i haz i mietały pieršaha pieradziełu nie patrebnyja. Vydalim abviedzienaje čyrvonym. Usio, niama nijakaj ekanomiki Rasii i samoj Rasii.
Ale jašče horš vyhladaje analiz prybytku siektaraŭ ekanomiki:
«Pavodle dadzienych apublikavanaha ŭ sieradu rejtynhu najbujniejšych rasijskich kampanij RBK 500, sukupny dachod naftavych kampanij ŭ 2014 hodzie skłaŭ 19,8 trłn rub., abo 35,3% usioj vyručki ŭdzielnikaŭ rejtynhu, a voś čysty prybytak — 1,98 trłn rub. — 97,7% usiaho čystaha prybytku. Na astatnija haliny pryjšłosia ŭsiaho 46 młrd rub. prybytku.
Kali ŭ jakaści vyniku dziejnaści ajčynnaha biźniesu ŭličvać tolki prybytak, inšych halin u Rasii pa sutnaści nie isnuje».
Heta značyć, 98% čystaha prybytku 500 najbujniejšych kampanij — heta nafta i haz, a ŭsio astatniaje — 2%. Zrazumieła, što cieniavaja ekanomika jość i ŭsio takoje, ale paradak ličbaŭ nie źmienicca.
Heta značyć, ničoha niama. Nafta i haz — heta adzinaje, dzie jość lehalnyja prybytki. Dzie možna ŭzbahacicca. I mienavita hetyja haliny znachodziacca pad maksimalnym dziaržaŭna-aliharchičnym kantrolem. Heta značyć, uzbahačajucca nie talenavityja pradprymalniki, a adzinki — aliharchi i sotni — čynoŭniki.
Voś tak i vyhladaje toj samy «syravinny prydatak Zachadu». Stolki hadoŭ kryčali, što nie damo vašynhtonskamu abkamu siabie ŭ jaho pieratvaryć, i mienavita ŭ jaho dobraachvotna pieratvarylisia.
Pahladzicie znoŭ na vierchniuju karcinku. Usio, čaho my zmahli pabudavać za 25 hadoŭ — handlovyja sietki, bankaŭski siektar i kamunikacyi. Usio astatniaje — ad nafcianki da mašynabudavańnia i enierhietyki — heta ŭsio spadčyna SSSR.
I hałoŭnaje: za 15 hadoŭ vysokich koštaŭ na syravinu voś toje samaje, abviedzienaje čyrvonym, atrymała kałasalnyja prybytki. Dzie jany? Što na ich pabudavali? Kamu na ich ščaścia i bahaćcia kupili?
Vykapali ź ziamli skarb, pradali jaho na Zachad, a na hrošy kupili sabie navat nie rydloŭku i tačku, a prosta prava i dalej dla Zachadu skarby z svajoj ziamli kapać».
