Kolkaść achviar ciskaniny ŭ dalinie Mina blizu Mieki dasiahnuła dźviuch tysiač, paviedamiŭ kiraŭnik arhanizacyi chadžu ŭ Iranie Said Achadzi sa spasyłkaj na krynicy ŭ Saudaŭskaj Aravii. Pra heta paviedamlaje ria.ru ca spasyłkaj na telekanał PressTV.
Pavodle aficyjnych dadzienych saudaŭskaha boku, ciskanina pryviała da hibieli 717 čałaviek, ranieńni atrymali jak minimum 863. Adnak dadzienyja ličby byli apublikavanyja dniom u čaćvier, novaj infarmacyi pra kolkaść achviar pakul niama.
U svaju čarhu pradstaŭnik Viarchoŭnaha lidara Irana Chadžatalesłam Siejed Ali Hazi-Askar zajaviŭ, što paśla ciskaniny blizu Mieki nie mienš za 365 iranskich pałomnikaŭ prapali bieź viestak. Raniej Achadzi paviedamiŭ pra 131 achviaru siarod irancaŭ.
Ułady Irana ŭ čaćvier abviaścili trochdzionnuju žałobu ŭ pamiać ab achviarach ciskaniny. Akramia taho, ajatała Ali Chamieniei zajaviŭ, što pryčynaj trahiedyi stali «chałatnaść» i «niekarektnyja dziejańni» ŭładaŭ Saudaŭskaj Aravii.
Trahiedyja ŭ dalinie Mina adbyłasia ranicaj u čaćvier. Dva vielizarnyja patoki pałomnikaŭ sutyknulisia na nievialikaj płoščy ŭ miescy źlićcia dvuch vulic, jakija viaduć ad namiotavych miastečkaŭ da miesca vykanańnia adnaho z najvažniejšych abradaŭ chadžu — «pabivańnia kamianiami djabła». Naśledny prync Saudaŭskaj Aravii Muchamied bien Najef Al Saud rasparadziŭsia stvaryć kamisiju pa rasśledavańni pryčyn ciskaniny padčas chadžu.
