Naviedvalniki raźličvalisia kartkami ŭ kafe na adnoj z aŭtazapravak Hrodna i navat nie padazravali, što ich PIN-kod padhladajuć, a infarmacyju z kartak kapijujuć, kab zatym źniać ź ich miljony rubloŭ.
24-hadovy barmen dziejničaŭ u źviazku sa svaim starejšym pryjacielem. Miechanizm dakładna adpracavali. Rabotnik kafe braŭ u naviedvalnika płastykavuju kartku. Pravodziŭ joju pa terminale, kab apłacić kuplu. Prapanoŭvaŭ klijentu ŭvieści PIN-kod i sačyŭ, jakija ličby jon nabiraje. Adnačasova niezaŭvažna dla klijenta pravodziŭ kartkaj druhi raz pa kišennym kart-rydary pamieram krychu bolš za zapalnicu. Rekvizity rachunka zastavalisia ŭ pamiaci hetaj pryłady, jakaja dazvalała zachoŭvać źviestki pra sotni kartak adnačasova. Klijent sychodziŭ, ničoha nie zapadozryŭšy. A paźniej da jaho kartki rabili dublikat i zdymali ź jaje dapamohaj u bankamatach hrošy, raspavioŭ «Viačerniamu Hrodna» načalnik ARZSVT UUS Hrodzienskaha abłvykankama Siarhiej Čarniak.
Siabry dziejničali mienš za miesiac. U sakaviku-krasaviku hetaha hoda jany paśpieli skapijavać infarmacyju z 18 kartak, zrabić kopii da 16 ź ich i vykraści bolš za 50 miljonaŭ rubloŭ. Infarmacyju, sčytanuju z adnoj z kartak, pradali praź internet u ZŠA. Viadoma, što niechta sprabavaŭ apłacić kuplu ŭ 176,43 dalara ŭ hipiermarkiecie horada Małdena. Adnak tranzakcyja nie prajšła. Jašče niekalkim padmanutym hrodziencam pašancavała zachavać svaje hrošy dziakujučy tamu, što zmoŭščyki niapravilna zapisali PIN-kod. Niekatoryja paciarpiełyja zdahadalisia pra afioru, kali praz SMS-bankinh atrymali paviedamleńnie ab źniatych miljonach. Jany adrazu ž źviarnulisia ŭ bank i zabłakavali svaju kartu. Paźniej, kali zadumu barmena raskryli, usie kartki, jakija prajšli praz terminał u złaščasnym kafe, dla biaśpieki aŭtamatyčna zabłakavali, dadaŭ načalnik UUS ARZSVT UUS Hrodzienskaha abłvykankama Siarhiej Čarniak..
Usie vykradzienyja hrošy chłopcy paśpieli rastracić. Zaraz zaviedziena 11 kryminalnych spraŭ pa č. 3 art. 212 KK Biełarusi («Kradziež šlacham vykarystańnia kampjutarnaj techniki», sankcyi jaje praduhledžvajuć pazbaŭleńnie voli na termin ad troch da dziesiaci hadoŭ), a taksama č. 2 art. 349 KK Biełarusi («Niesankcyjanavany dostup da kampjurnaj infarmacyi»), art. 352 KK Biełarusi («Niepravamiernaje zavałodańnie kampjutarnaj infarmacyjaj») i č. 2 art. 343 KK Biełarusi («Vyrab i raspaŭsiud parnahrafičnych materyjałaŭ»). Kryminalnaja sprava razhladajecca ŭ sudzie. Viadoma, što barmen byŭ raniej sudzimy za kradziež, adznačyŭ Siarhiej Čarniak.
