Za dvajnoje zabojstva asudžany 47-hadovy biespracoŭny žychar Bresta.
Jak paviedamiła staršy prakuror adździeła prakuratury Bresckaj vobłaści Darja Žuk, jakaja padtrymlivała dziaržaŭnaje abvinavačańnie pa spravie, abvinavačvany žyŭ u Breście ŭ pryvatnym domie sa svaim bratam i jaho žonkaj.
2 žniŭnia 2014 hoda mužčyna na hlebie asabistych niepryjaznych adnosin spačatku ŭ dvary doma, zatym u chlavie źbiŭ rukami i nahami 48-hadovaha brata, a taksama ŭdaryŭ jaho pa hałavie rabrom čyhunnaj batarei. U vyniku ad atrymanych ciažkich cialesnych paškodžańniaŭ paciarpieły pamior na miescy.
U noč na 3 žniŭnia abvinavačvany zadušyŭ u domie 36-hadovuju žonku brata. Zatym trupy abodvuch zakapaŭ u chlavie pobač z domam.
Ich cieły byli znojdzienyja 4 maja 2015 hoda ŭ chodzie apieratyŭna-vyšukovych mierapryjemstvaŭ pa ŭstanaŭleńni miescaznachodžańnia muža i žonki, jakija ličylisia adsutnymi bieź viestak.
47-hadovy mužčyna byŭ zatrymany pa padazreńni ŭ zabojstvie.
28 vieraśnia sudovaja kalehija pa kryminalnych spravach Bresckaha abłasnoha suda pryznała jaho vinavatym u supraćpraŭnym pazbaŭleńni žyćcia (zabojstvie) dźviuch asob, adno ź jakich učyniena z asablivaj žorstkaściu, druhoje — asobaj, jakaja raniej učyniła zabojstva (p. 6, 16 č. 2 art. 139 KK), i pryhavaryła da 24 hadoŭ pazbaŭleńnia voli ŭ kałonii ŭzmocnienaha režymu.
«U sudovym pasiadžeńni mužčyna pryznaŭ svaju vinu častkova, admaŭlajučy namier na zabojstva brata», — skazała Žuk.
Pryhavor jašče nie nabyŭ zakonnuju moc i moža być abskardžany.
* * *