Padčas vystupu prezidenta Rasii Uładzimira Pucina na Hienieralnaj asamblei AAN ŭkrainskaja delehacyja razharnuła prastreleny ściah. Ściah byŭ pryviezieny ź Iłavajska, dzie ŭ žniŭni 2014 išli žorstkija bai pamiž ukrainskaj armijaj i rasijskimi siłami z samaabvieščanaj «Danieckaj narodnaj respubliki».
hromadske.tv
«Naša delehacyja vyjšła z zały padčas vystupu tavaryša Pucina. Na bałkonie pierad im byŭ razhornuty ściah Ukrainy ź Iłavajska! Chaj bačyć», — napisaŭ u svaim tvitary pastajanny pradstaŭnik Ukrainy pry AAN Juryj Siarhiejeŭ.
Padčas vystupu Pucina ŭkrainskaja delehacyja pakinuła zału Hienieralnaj asamblei AAN. Raniej toje ž zrabiła delehacyja Rasii padčas vystupu prezidenta Ukrainy Piatra Parašenki. Tady ŭ zale zastaŭsia tolki adzin rasijski dypłamat.
Pucin, vystupajučy na Hienasamblei AAN u paniadziełak, zajaviŭ, što cełasnaść Ukrainy nie zabiaśpiečyć pahrozami i siłaj zbroi. Pavodle jaho słoŭ, treba ŭličvać intaresy i pravy žycharoŭ Danbasa, pavažać ich vybar, i, jak praduhledžvajuć Minskija pahadnieńni, uzhadnić ź imi klučavyja elemienty ŭstrojstva dziaržavy.
Bai ŭ Iłavajsku i jaho vakolicach, adkul byŭ pryviezieny ściah, razhornuty ŭkrainskaj delehacyjaj, išli z 10 žniŭnia pa 3 vieraśnia 2014 hoda. U chodzie bajoŭ ŭkrainskija vajskoŭcy častkova ŭziali horad pad svoj kantrol, ale paźniej byli akružany i trapili ŭ tak zvany «Iłavajski kacioł».
U vyniku Iłavajsk pierajšoŭ pad kantrol sił «DNR». Pa dadzienych ukrainskaj armii, u bajach za Iłavajsk zahinuli 366 vajskoŭcaŭ, 289 atrymali ranieńni, 128 trapili ŭ pałon i 158 prapali bieź viestak.