15 sakavika a 14-j na siadzibie Tavarystva biełaruskaj movy ŭ Miensku startavała Pieršaja ahulnananacyjanalnaja dyktoŭka. Udzieł u joj brali pasły zamiežnych krainaŭ, dziejačy kultury, pradstaŭniki ŚMI.
Dyktoŭka, prymierkavanaja da 90-hodździa BNR, zadumlałasia najpierš jak akcyja salidarnaści, pisać jaje ŭsienarodna prapanujecca 23 sakavika. "Siońniašniaja sustreča na TBM była vyklikanaja tym, što nia ŭsie dyplamaty, jakija zachacieli vykazać padtrymku biełaruskaj movie, zmohuć uziać udzieł u dyktoŭcy 23-ha", — kaža inicyjatar idei Ŭładzimier Padhoł.
Na Siadzibu TBM pryjšli dyplamaty ź Vialikaj Brytanii, ZŠA, Litvy, Polščy, Słavakii, Ukrainy, Čechii i Švecyi. Pierad ułasna pisańniem adbyŭsia impravizavany paetyčny festyval, zładžany siłami dyplamatyčnaha korpusu. Časovy pavierany ŭ spravach Słavaččyny ŭ Biełarusi Lubamir Rehak pračytaŭ vierš klasyka słavackaje litaratury Paŭła Orsaha Hviezdasłava, pryśviečany rodnaj movie. Pierakład rabiŭ sam spadar Rehak z dapamohaju Vasila Siomuchi. Śledam hučali pa-biełarusku tvory ź litoŭskaje, polskaje, ukrainskaje klasyki, jakija čytali pradstaŭniki hetych krainaŭ -- savietnik pasła Litvy Daryus Vitkaŭtkas, pres-sakratar pasolstva Polščy Monika Sadkoŭska, pasoł Ukrainy Ihar Lichovy. Časovy pavierany ŭ spravach Vialikabrytanii Najdžeł Hułd-Devis pračytaŭ pa-anhielsku adzin z sanetaŭ Janki Kupały. Hetyja vystupy-pryśviačeńni, pavodle słovaŭ inicyjataraŭ, musiła raspačać čytańniem pa-biełarusku «Bilu ab pravach čałavieka» pasoł ZŠA Karen Stjuart.
U jakaści tekstu dyktoŭki była abranaja trochi adaptavanaja pradmova da «Dudki biełaruskaj» Franciška Bahuševiča. Zamiežniki, chto nie pačuvaŭsia peŭnym u movie, pisali dyktoŭku pa-svojmu, praź pierakładčykaŭ.
Pradstaŭnik Švecyi Stefan Eryksan pisaŭ dyktoŭku pa-biełarusku i siarod pieršych zdaŭ jaje na pravierku. Inšy vydatny znaŭca biełaruskaj movy, ambasadar Izrailu Zejeŭ Ben-Arje, nia zmoh prysutničać z pryčyny šabatu. Ale jon paabiacaŭ uziać udzieł u ahulnanacyjanalnaj dyktoŭcy 23 sakavika.
«Hałoŭnaja ž tut nia kolkaść pamyłak, hałoŭnaje — udzieł, — kaža U. Padhoł. — Hałoŭnaje — pakazać, što mova naša dla nas śviataja».
