Jeŭrasajuz pakul nie vyrašyŭ los sankcyj u dačynieńni da Biełarusi, paviedamiła pres-sakratar Jeŭrapiejskaj słužby źniešnich dziejańniaŭ Maja Kačyjančyč.
Na pytańnie BiełaPAN, ci sapraŭdy jość rašeńnie ab prypynieńni sankcyj, Kačyjančyč adkazała: «Nie. Rašeńnie pra budučyniu abmiežavalnych mier u dačynieńni da Biełarusi pavinna być pryniataje da kanca kastryčnika».
Jana adznačyła, što biełaruskaja tema nie abmiarkoŭvałasia na pasiadžeńni Rady ministraŭ zamiežnych spraŭ krain ES 12 kastryčnika, adnak viarchoŭny pradstaŭnik ES pa źniešniaj palitycy i palitycy biaśpieki Fiederyka Mahieryni zhadała pra prezidenckija vybary, jakija prajšli ŭ Biełarusi, vystupajučy pierad ministrami ŭ pačatku pasiadžeńnia.
U toj ža čas rasiejskaje ahienctva TASS sa spasyłkaj na dziaržsakratara Francyi pa jeŭrapiejskich spravach Arlema Dezire paviedamiła, što na pasiadžeńni 12 kastryčnika ŭ Luksiemburhu Rada ES pa zamiežnych spravach pryniała rašeńnie prypynić na čatyry miesiacy dziejańnie sankcyj u dačynieńni da Biełarusi. Ahienctva Asašyejted Pres pryvodzić vykazvańnie Dezire, jaki zajaviŭ, što ministry damovilisia ab prypynieńni sankcyj i heta rašeńnie budzie aformlenaje na praciahu niekalkich tydniaŭ. Jon padkreśliŭ, što ŭ vypadku nieabchodnaści sankcyi buduć nieadkładna adnoŭlenyja.
