Novaja redakcyja hienpłana Minska praduhledžvaje rekanstrukcyju 15% terytoryj pramysłovych pradpryjemstvaŭ, paviedamiŭ žurnalistam 14 kastryčnika na prezientacyi karekciroŭki Hienieralnaha płana Minska hałoŭny architektar UP «Minskhrada» Alaksandr Akienćjeŭ.
Pavodle jaho słoŭ, užo zaraz realizujecca płan vynasu niekatorych pradpryjemstvaŭ za rysu horada. Tak, adbyvajecca vyzvaleńnie terytoryi aeraporta «Minsk-1» pad zabudovu kompleksu «Minsk-Mir», vynosiacca avijaramontny zavod i inšyja pradpryjemstvy. Taksama idzie vysłabanieńnie terytoryi ptuškafabryki imia Krupskaj. «Užo ŭ vialikim abjomie vykanany znos vytvorčych płoščaŭ, i heta terytoryja płanujecca da asvajeńnia ŭ najbližejšyja hady», — paviedamiŭ hałoŭny architektar.
Jon zaznačyŭ, što ŭ Minsku pad vytvorčaści zaniata 4 tys. ha terytoryj. «Treba dyfierencyravana padychodzić da ŭsich vytvorčych terytoryj i tam, dzie lišak pracoŭnaj siły, nie treba stvarać vialikuju kolkaść pracoŭnych miescaŭ», — skazaŭ Akienćjeŭ. U Minsku nieraŭnamierna raźmierkavanyja terytoryi prykładańnia pracy, što vyklikaje pikavyja nahruzki na transpart, kali nasielnictva jedzie na pracu abo viartajecca z pracy. Tak, u Centralnym rajonie ŭzrovień zabiaśpiečanaści składaje 500 miescaŭ na 1.000 nasielnictva, u Frunzienskim — 33. «My hetu prablemu ličym važnaj i ŭličvajem u hienieralnym płanie», — skazaŭ hałoŭny architektar.
Taksama jon paviedamiŭ, što idzie vysłabanieńnie terytoryi vajennych haradkoŭ. Siarod ich jon nazvaŭ abjekty pa vulicach Majakoŭskaha, Novavilenskaj, Kabuškina i inšyja. «Źmianieńnie funkcyj dazvalaje raźmiaścić tam vialiki abjom žylla», — zaznačyŭ śpiecyjalist.
