 |
Užo treci hod pałac u Śviacku, što pad Horadniaj, imkliva razburajecca: advalvajecca tynkoŭka, raściarušvajucca ścieny… Pałac maje ahromnistuju architekturnuju kaštoŭnaść. Jaho zbudavaŭ u 1779 hodzie italijski architektar Džuzepe Saka. Usio ‑‑ kaminy, žyrandoli, vazony dla kvietak, mebla — rabiłasia pa jahonym ekskluziŭnym prajekcie. Pałac byŭ azdobleny bahataj lapninaj.
U 1930‑ch hadach tut była stvoranaja adzinaja na toj čas u Polščy narkalahičnaja lakarnia. Miascovyja žychary j zaraz pamiatajuć tutejšych pacyjentaŭ, jakich nazyvali «šlachta» — bo tyja prahulvalisia pa pałacavym parku ŭ impazantnych kapialušach i strojach.
Da 2005 hodu tut mieściłasia suchotnaja lakarnia. Ale jak tolki medyčnaja ŭstanova pakinuła pałac, jon pačaŭ razburacca. Hrošaj na restaŭracyju niama.
Tamu pałac i sabralisia vystavić na aŭkcyjon. Pieršapačatkovaja cana — 1,5 miljarda rubloŭ — napužaŭ pakupnikoŭ. Im padałosia, što za pałac nie ŭ najlepšym stanie heta zašmat. Tamu zaraz u Śviacak nakiravałasia admysłovaja dziaržaŭnaja kamisija, jakaja musić jašče raz acanić košt pałacu. Čalcy kamisii sami zaznačajuć, što kali terminova nie pačać adnaŭleńnie hetaha pomniku architektury, jaho možna paprostu stracić.
Jak vyhody pałacu pakupnikam pieraličvajecca blizkaść Aŭhustoŭskaha kanału, vadapravod, kacielnaja, aŭtamabilnaja trasa pobač. Idealnaje miesca dla stvareńnia hatelu!..
Zaraz mienskija admysłoŭcy pracujuć nad acenkaj. Ichnaja meta najpierš — vystavić prymalny košt, kab pałac narešcie niechta nabyŭ — heta značycca, uratavaŭ.
Pavodle prezydenckaha ŭkazu, jaki dziejničaje ad 2007 hodu, u metach pryciahnieńnia da haspadarki budynkaŭ, jakija nie vykarystoŭvajucca, ich dazvalajecca pradavać za minimalny košt u 1 bazavuju vieličyniu — zaraz heta 35 tysiač rubloŭ, ci 16 dalaraŭ. Da prykładu, ciapier u krainie za taki košt aficyjna pradajecca 38 budynkaŭ. Napraŭdu, na aŭkcyjonach hety košt zvyčajna padvyšajecca ŭ tysiačy razoŭ.
Admysłoŭcy kažuć, što dla pałacu ŭ Śviacku prodaž za 1 bazavuju vieličyniu — heta skrajni krok. Alo jon mahčymy.
Fota: Maskim Šybieka, Radzima.org
