U Baranavičach 22 kastryčnika sud vynies pryhavor aŭtamabilistu za ŭčynieńnie DTZ sa śmiarotnym zychodam.
Jak paviedamiŭ staršy pamočnik Baranavickaha mižrajonnaha prakurora Alaksandr Žuk, jaki padtrymlivaŭ dziaržaŭnaje abvinavačvańnie pa spravie, 25 lipienia kala 6.00 u Baranavickim rajonie na bierazie vadajoma niedaloka ad vioski Zastaryńnie 26-hadovy žychar Baranavičaŭ, jaki kiravaŭ aŭtamabilem «Volva», učyniŭ najezd na turystyčny namiot.
Dziaŭčyna, jakaja była ŭ namiocie, ad atrymanych cialesnych paškodžańniaŭ zahinuła na miescy zdareńnia. Jana pražyvała ŭ Baranavičach.
Napiaredadni zdareńnia kampanija maładych ludziej, u jakoj byli 26-hadovy kiroŭca i 21-hadovaja dziaŭčyna, pryjechała na adpačynak da vadajoma. Jany ŭstanavili namioty dla načlehu. Zatym na praciahu nočy mužčyny z hetaj kampanii za stałom raśpivali śpirtnyja napoi.
Ranicaj aŭtamabilist vyrašyŭ pierastavić svoj «Volva». U vyniku jon pierajechaŭ vohnišča i najechaŭ na namiot, dzie znachodziłasia dziaŭčyna. Ahlad vyjaviŭ u kryvi kiroŭcy kancentracyju etyłavaha śpirtu 1,6 pramile.
Sud Baranavickaha rajona i horada Baranavičy pryznaŭ jaho vinavatym na padstavie č. 4 art. 317 KK (parušeńnie praviłaŭ darožnaha ruchu asobaj, jakaja kiravała transpartnym srodkam u stanie ałkaholnaha apjanieńnia, što mieła vynikam pa nieaściarožnaści śmierć čałavieka, i pryhavaryŭ da šaści hadoŭ pazbaŭleńnia voli z adbyvańniem pakarańnia ŭ kałonii-pasialeńni. Jon pazbaŭleny prava kiravańnia transpartnymi srodkami terminam na 5 hadoŭ.
Sud spahnaŭ z abvinavačvanaha 150 młn. rubloŭ u košt kampiensacyi maralnaha ŭronu na karyść maci zahinułaj dziaŭčyny. Na momant vyniasieńnia pryhavoru 15 młn. rubloŭ z ahulnaj spahnanaj sumy ŭžo byli kampiensavanyja.
U sudzie mužčyna pryznaŭ svaju vinu i čystasardečna raskajaŭsia. Raniej jon pryciahvaŭsia da administracyjnaj adkaznaści, u tym liku za parušeńnie praviłaŭ darožnaha ruchu.
Pryhavor jašče nie nabyŭ zakonnuju moc i moža być abskardžany.
