Učora Kamitet dziaržaŭnaj biaśpieki abvieściŭ ab zatrymańni arhanizataraŭ hrupy, jakaja zajmałasia prasłuchoŭvańniem bolš za 2 tysiač biełarusaŭ — pradstaŭnikoŭ ułady, biznesu i ŚMI. Pavodle pres-słužby KDB, złačyncy mieli bolš za 1,5 tysiačy zamoŭcaŭ. Pakul mała infarmacyi, chto mienavita byli zamoŭcami hetaha prasłuchoŭvańnia i što chavajecca za hetaj historyjaj. «Naša Niva» sabrała najbolš imaviernyja viersii.
Fejk?
Ździŭlać strašyłkami biełaruskija siłaviki zdolnyja. Šmat ža chto pamiataje «dochłych pacukoŭ», jakimi chacieli atrucić stalicu pierad vybarami 2006, pavodle Ściapana Sucharenki. Pierad hetymi vybarami była infarmacyja pra zatrymanych 200 ukraincaŭ, jakija ź bitami jechali na biełaruskija vybary. I dzie ž tyja ŭkraincy?
Były kiraŭnik Frunzienskaha adździeła KDB u Minsku Alaksandr Bahanioŭ takoj viersii nie vyklučaje. «Naŭskidku ja dumaju, što heta čarhovaja sprava, kab dać elektaratu «pažyvu». Daŭno ž ničoha takoha nie było. Vybary ž navat prajšli adnosna cicha».
Hrupoŭka dziejničała na praciahu troch hadoŭ, słuchali čynoŭnikaŭ i siłavikoŭ, a pra ich KDB ničoha nie viedaŭ. Niaŭžo takoje byvaje?
Śpichnuć «žučok» Labiedźki?
Časam zdarajecca tak, što samyja prymityŭnyja viersii taksama majuć prava na isnavańnie.
Zusim niadaŭna lidary apazicyi Anatol Labiedźka, Uładzimir Niaklajeŭ i Mikałaj Statkievič vyjavili «žučok» prasłuchoŭvańnia ŭ survetnicy ŭ kaviarni «Sałodki falvarak».
Kali stała viadoma pra kryminalnuju spravu pa prasłušcy, to mnohija paŭžartam napisali ŭ fejsbuku: «Zaraz na ich «žučok» Labiedźki paviesiać». Maŭlaŭ, nie my prasłuchoŭvajem, a niejkija nielehały.
Špijanaž?
Źviartaje ŭvahu, što siarod tych, kaho prasłuchoŭvali, vielmi šmat dziaržaŭnych słužačych i siłavikoŭ, praktyčna z usich viedamstvaŭ. Heta i navodzić na dumku ab mahčymym zamiežnym śledzie ŭ spravie. Ci mahła zamiežnaja raźviedka karystacca pasłuhami pryvatnaj kampanii na terytoryi Biełarusi?
My paprasili prakamientavać hetuju viersiju byłoha supracoŭnika MUS, zasnavalnika sajta Belarus Security Blog Andreja Paratnikava. «Tearetyčna zamiežnyja vyviedki mahli karystacca pasłuhami hetych ludziej, «zamaŭlajučy» im peŭnych dziaržsłužboŭcaŭ. Ale šukać tut naŭprostavuju ruku zamiežnaj stalicy pakul padstavaŭ niama. Za miažoj takija vypadki nie redkaść: nielehalnaje sačeńnie, kradziež ci zdymańnie infarmacyi – častka niezakonnaha biznesu u šmat jakich krainach. Ale heta mienavita kryminał. Jakim praŭda tearetyčna mohuć skarystacca i śpiecsłužby. Kab nie śviacicca samim. Tym bolš, što časta pasłuhi kryminalnikaŭ atrymlivajucca tańniejšymi za apieratyŭnuju pracu samich raźviedčykaŭ. I vynik možna atrymać chutčejšy, bo biurakratyi značna mienš».
Razborka pamiž śpiecsłužbami?
Niaredka pierad važnymi kadravymi pierastanoŭkami ŭ siłavym błoku možna nazirać dastatkova dziŭnyja kryminalnyja spravy. Pierad samym zvalnieńniem byłoha kiraŭnika KDB Vadzima Zajcava była zaviedzienaja kryminalnaja sprava pa artykule «Zdrada Radzimie» suprać navapołackaha ślesara Andreja Hajdukova. Jak viadoma, urad padaŭ u adstaŭku, novy jašče nie pryznačany, nie vyklučanyja pierastanoŭki i ŭ siłavym błoku.
Alaksandr Bahanioŭ dapuskaje i takoje. «Moža być pierakryžavańnie intaresaŭ śpiecsłužb. Prasłuškaj ža zajmajecca i DFR, i milicyja, i AAC, i słužba biaśpieki prezidenta. Ja nie vyklučaju, što moh prakałocca niechta ź ich, a ciapier maŭčyć. Kali heta tak, to spravu pavinny spuścić na tarmazach».
Reŭnaść? Kryminał?
Ličby ŭ hetaj kryminalnaj spravie ŭražvajuć. Až 1500 zamoŭcaŭ za try hady. Heta bolš čym pa adnoj zamovie ŭ dzień. Cikava, voś vašy ŭłasnaj siabry i znajomyja mahli karystacca takimi pasłuhami? Vykazvajecca mierkavańnie, što prasłušku moh zakazvać raŭnivy muž na žonku. Ale, jak kažuć śpiecyjalisty, nabyć admysłovaje prystasavańnie dla hetaha možna navat na Ždanovičach. Ci šmat takich apantanych ludziej, što buduć z hetym źviartacca da admysłoŭcaŭ?
Alaksandr Bahanioŭ, jaki šmat hadoŭ prapracavaŭ u KDB, taksama adkidvaje viersiju z kryminałam. «U nas jaho niama, arhanizavanaha kryminału. Moža, kaniečnie, niejkaja hrupoŭka pačała padymać hałavu, ale heta vielmi niepraŭdapadobna».
Dekłaravany śpis abjektaŭ dla prasłuchoŭvańnia — supracoŭniki dziaržorhanaŭ, siłaviki, dziaržaŭnyja i niedziaržaŭnyja žurnalisty — navodzić na dumku pra mahčymy śled zamiežnaj raźviedki ŭ hetaj spravie. Bo kali b havorka išła pra zvyčajnuju firmu, to chto moh by być jaje klijentami? Žonka — na muža, partnior pa biznesie — na partniora.
Ale ŭ toj ža čas KDB zajaviŭ pra 1500 zamoŭcaŭ. Absalutna nierealnaja ŭ biełaruskich umovach ličba. Mienavita tamu ekśpierty nie vyklučajuć pra niejkuju bolš składanuju hulniu śpiecsłužbaŭ ci fejk. Uvohule, biełaruskim śpiecsłužbam bolš ułaściva chavać infarmacyju, čym publikavać.
