 Henik Łojka |
Talenavitamu skulptaru, aŭtaru słavutych pleneraŭ «Lehienda ź piasku» Heniku Łojku pahražajuć mahčymym zvalnieńniem z pracy. Pra heta vykładčyku skulptury paviedamiła kiraŭnictva Minskaj siaredniaj škoły №185 z architekturna‑mastackim uchiłam, dzie jon pracuje.
Niezadavolenaść pracaj vykładčyka vynikaje nie praź jaho prafesijnyja jakaści, a praz aktyŭnuju hramadzianskuju pazycyju, jakuju kiraŭnictva SŠ № 185 charaktaryzuje, jak «vovlečienije dietiej v politiku». Nasamreč, vykładčyk skulptury Henik Łojka paviedamiŭ svaim vučniam pra histaryčnyja fakty, źviazanyja sa śviatkavańniem Dnia Voli 25 sakavika.
Hetaj nahody było dastatkova, kab za «razumnaha» vykładčyka ŭzialisia rajonnyja ideołahi.
Henik Łojka nakiravaŭ Adkryty list dyrektaru SŠ №185 Halinie Jurcevič, u jakim patrabuje kanstruktyŭnych i arhumientavanych acenak histaryčnych padziej, jakija ctali dla biełarusaŭ sapraŭdnymi nacyjanalnymi śviatami.
ADKRYTY LIST
dyrektaru SŠ 185 Jurcevič Halinie Ivanaŭnie
Šanoŭnaja Halina Ivanaŭna!
Na moj pohlad, namieśnik dyrektara pa idealahičnaj pracy, Śviatłana Vitaleŭna Rozum, nie spraŭlajecca sa svajoj misijaj danosić i tłumačyć nam, nastaŭnikam dy vučniam , mudraść dziaržaŭnaje idealohii. Idealohija—heta, jak ja razumieju, strojnaja sistema pohladaŭ, pavodle jakoj možna rastłumačyć lubuju žyćciovuju źjavu. Adnojčy 21 lutaha, kali ja raźviesiŭ u faje našaj škoły majo vinšavańnie ź Mižnarodnym dniom achovy rodnaje movy, Śviatłana Vitaleŭna zryvała heny plakat. Zryvać to jana zryvała, ale dać uciamnaje tłumačeńnie svaim dziejańniam pavodle ŭsiemahutnaj dziaržaŭnaj idealohii nie zmahła. Adkaz kštałtu «Nielzia! Raźvie vy nie ponimajetie?» mianie—čałavieka z vyšejšaj adukacyjaj za plačyma—absalutova nie zadavalniaje. Ja prymaju tolki arhumentavanyja adkazy. Tamu ja źviartajusia da Vas, vyšejstajačaha dziaržaŭnaha čynoŭnika, budźcie tak łaskavyja rastłumačyć mnie niekatoryja rečy z vyšyni dziaržaŭnaje idealohii.
My, biełarusy, majem dzień 25 sakavika. Nia hledziačy na toje, što Vy, Halina Ivanaŭna, hadavalisia nie ŭ Biełarusi, jak historyk, Vy musicie viedać, što ŭ hety dzień 1918 hodu Biełaruskaja dziaržava dakumentalna aznačyła sabie šlach—NIEZALEŽNAŚĆ. Vy heta viedajecie. Bo heta—histaryčnaja praŭda. Inšaja sprava, što, mahčyma, heta nie vyklikaje ŭ Vašym sercy anijakaha vodhuku. Ale paviercie mnie na słova, dla nas, biełarusaŭ, heta—śviatynia, heta—vielmi, vielmi, vielmi važny dzień. A nazyvać Dniom Niezaležnaści 3 lipienia—heta paprostu histaryčnaja mana. Bo ŭ toj dzień biełarusy nie prymali kursu na niezaležnaść. Tady ŭ biełarusaŭ byŭ tolki adzin kurs—«Na Berlin!»
Halina Ivanaŭna, rastłumačcie mnie, kali łaska, z pazicyi dziaržaŭnaj idealohii, čamu Dzień Abaroncaŭ Ajčyny adznačajecca mienavita 23 lutaha? Vy, jak nastaŭnica historyi, peŭna, dabivajeciesia ad biełaruskich vučniaŭ, kab viedali napamiać daty bliskučych pieramoh biełaruskaje zbroi: 15 lipienia i 8 vieraśnia. Niaŭžo štości bolš słaŭnaje ździejśnili našy mužčyny 23 lutaha? Na kolki ja viedaju, u heny dzień u časy niamieca‑fašystoŭskaje akupacyi utvaryŭsia niejki bataljon Biełaruskaj Vajskovaj Samapomačy. Ale ž, zhadziciesia, heta nie nahoda navat kab prosta vypić, nia kažučy ŭžo pra Śviata Ŭsiaje Krainy. Ci, moža, u asnovu Dnia Abaroncaŭ Biełaruskaj Ajčyny lehła data z historyi inšaj, susiedniaj dzaržavy? Tady heta budzie idealohija kalanijalnaj, a nie suverennaj dziaržavy.
Padviadziem vyniki. Śviata, zasnavanaje na histaryčnaj praŭdzie, maje kanstruktyŭny charaktar. A śviata, zasnavanaje na histaryčnaj manie—destruktyŭny. A jak na heta paziraje dziaržaŭnaja idealohija? Spadziajusia, što dziaržaŭny čynoŭnik Vašaha ranhu zdolny dać mnie kampetentny adkaz, nie prybiahajučy da kadebistaŭ. U ich jość bolš važnyja zadačy—iany dni i nočy łoviać dziaržaŭnych złačyncaŭ. A naša z Vami zadača—davać vučniam viedy kanstruktyŭnaha charaktaru. I jašče adno pytańnie, čamu majo imknieńnie danieści dzieciam praŭdu Vy nazyvajecie «vovlečienijem dietiej v politiku»?
Z pavahaju, Hienadź Łojka.
19 sakavika 2008 hodu.
Prapanuju rašuča padtrymać Henika Łojku, pakinuŭšy svajo mierkavańnie na haściavoj staroncy sajta škoły: http://sch185.minsk.edu.by/
