Pasolstva Italii adkryvaje try vizavyja centry ŭ Biełarusi. Ab hetym paviedamili ŭ pres-słužbie italjanskaj dypłamatyčnaj misii ŭ Minsku.
Vizavy centr u Minsku pačnie rabotu 16 listapada, u Homieli — 18 listapada i ŭ Breście — 20 listapada.
Minski vizavy centr raźmieścicca ŭ biźnies-centry «Niamiha Sici» (vuł. Niamiha, 40); centr u Homieli — na vulicy Rečyckaj, 1A; u Breście — na vulicy Hohala, 82. Ustanovy buduć adkryty z paniadziełka pa piatnicu z 9.00 da 16.00 (akramia dziaržaŭnych śviat). U pieryjad najbolšaha napłyvu naviedvalnikaŭ mahčyma ŭviadzieńnie śpiecyjalnaha hrafika raboty, jaki praduhledžvaje dadatkovy pryjom, adznačyli ŭ pres-słužbie.
Z 2 listapada zajaŭniki zmohuć zabraniravać čas dla padačy dakumientaŭ na vizu, skarystaŭšysia anłajn-pasłuhaj papiaredniaha zapisu na sajcie.
Kiravańnie centrami ažyćciaŭlaje kampanija TLScontact - pieramožca tendara pa akazańni vizavych pasłuh na asnovie aŭtsorsinhu. Kampanija TLScontact źjaŭlajecca častkaj kampanii Teleperformance Group - suśvietnaha lidara na rynku vizavych pasłuh, što pradastaŭlajucca pa aŭtsorsinhu.
U pres-słužbie pasolstva adznačyli, što pasłuhi vizavych centraŭ pradastaŭlajucca ŭ strohaj adpaviednaści z patrabavańniami, ustanoŭlenymi italjanskim i biełaruskim zakanadaŭstvami. «Supracoŭniki centraŭ zmohuć prakansultavać naviedvalnikaŭ adnosna vydačy viz, pryniać ankiety i konsulski zbor, źniać adpiačatki palcaŭ i adskaniravać fatahrafii. Na ŭsich etapach padačy zajavy budzie zabiaśpiečany vysoki ŭzrovień biaśpieki zachoŭvańnia asabistych danych i abarony kanfidencyjalnaści, zhodna z normami biełaruskich i italjanskich zakonaŭ», — zapeŭnili ŭ pres-słužbie.
Košt pasłuhi składzie pryblizna 19 jeŭra biez uliku nievialikaj kamisii za valutna-abmiennyja apieracyi, pamier jakoj zastaniecca niaźmiennym. Apłata pasłuh i kamisii budzie ažyćciaŭlacca tolki ŭ biełaruskich rublach.
U toj ža čas vizavy adździeł pasolstva Italii ŭ Minsku pradoŭžyć pryjom zajaŭ na nacyjanalnyja i šenhienskija vizy.
