«Uvohule nielha ŭvajści dvojčy ŭ adnu i tuju ž raku. I, kładučy ruku na serca, treba skazać, što tady, u 1999 hodzie, biełaruskaja apazycyja była na paradak macniejšaja, čym ciapier. Bolej było ŭzajemnaha davieru, była vyšejšaja zdolnaść da kansalidacyi. Ciapier ža my bačym, što hetuju zajavu nia ŭsie apazycyjnyja lidery zhadzilisia padpisać», — adznačyŭ Kłaskoŭski ŭ interviju Radyjo Svaboda.
Ź inšaha boku, kaža analityk, Alaksandar Łukašenka zanadta ŭpeŭniena siabie adčuvaje, kab iści na pieramovy z apazycyjaj.
«Samaje hałoŭnaje, što biełaruski aficyjny lider siońnia na kani ŭ tym, što tyčycca dačynieńniaŭ z Eŭraźviazam. Jon adčuvaje siabie pieramožcam, bo aficyjny Miensk pracisnuŭ svoj farmat uzajemadziejańnia z Eŭropaj, kali taja biare pad uvahu najpierš prahmatyčnyja mierkavańni, u pryvatnaści čyńnik hieapalityki, i adsoŭvaje ŭbok pytańnie demakratyi dy pravoŭ čałavieka. Naturalna, rytaryčna Brusel nie admaŭlajecca ad hetych kaštoŭnaściaŭ, tak ci inakš prahavorvaje niejkija svaje pažadańni, ale prahavorvaje davoli miakka, i ja nia dumaju, što ciapier eŭrapiejcy stanuć nadta cisnuć na biełaruski režym, kab toj vykonvaŭ patrabavańni hetaj hrupy apazycyjnych lideraŭ. Dy nadta i nie naciśnieš na Łukašenku. Ja dumaju, što zachodniki zbolšaha ŭžo źmirylisia z dumkaj, što Łukašenku nie pierarobiš, ale prosta na tle siońniašniaj Rasiei, jaje ahresii va Ŭkrainie, avantury ŭ Syryi, uvohule palityki Pucina, jaki siońnia ŭjaŭlajecca najpieršym dyktataram Eŭropy, Łukašenka zdajecca nie takim užo kiepskim chłopcam», — kanstatuje ekspert.
«Kali ž reziumavać, ja b skazaŭ, što jak niejkaja deklaracyja, jak nahadvańnie Bruselu, što nia varta zabyvać pra kaštoŭnaści, hetaja zajava maje peŭny sens. Ale čakać ad jaje praktyčnaha vialikaha efektu nie vypadaje. Apazycyja musić realna pašyrać upłyŭ na masy, realna mieć niejkuju vahu, dastatkovuju dla taho, kab ź joj ličyłasia ŭłada. Siońnia sytuacyja nia taja, i sa słaboj apazycyjaj, jakaja navat pavodle niezaležnaj sacyjalohii maje nievialiki ŭpłyŭ na masy, naturalna, Łukašenka, jaki trymaje krainu ŭ kułaku i całkam kantraluje sytuacyju, nia zhodzicca siadać za adziny «kruhły stoł». Ni za kruhły, ni za kvadratny», — upeŭnieny Kłaskoŭski.
Učora stała viadoma, što piać demakratyčnych palitykaŭ — Siarhiej Kalakin, Anatol Labiedźka, Uładzimier Niaklajeŭ, Pavał Sieviaryniec i Mikałaj Statkievič — u adkrytym liście da kiraŭnictva EZ prapanavali pierazapuścić pieramovy za «kruhłym stałom» pamiž uładaj i apazycyjaj, zakanservavanyja ŭ 1999 hodzie.
Były kandydat u prezydenty Taciana Karatkievič paviedamiła, što joj nie prapanoŭvali padpisać hety zvarot.
