U Pałacy Niezaležnaści pačynajecca cyrymonija inaŭhuracyi Alaksandra Łukašenki. Tranślacyja mierapryjemstva idzie pa ŭsich dziaržaŭnych telekanałach krainy.
Kamientujuć cyrymoniju televiadučyja «Biełaruś-1» Dźmitryj Bačkoŭ i Alena Nasačova.
Čakajecca vyjezd prezidenckaha karteža z rezidencyi ŭ Drazdach u Pałac Niezaležnaści. Ruch u rajonie praśpiekta Pieramožcaŭ uščent pierakryty, Łukašenka budzie jechać pa pustoj darozie.
12:00
Kartež rušyć pa pustym praśpiekcie Pieramožcaŭ.
12:01
Alaksandr Łukašenka pryjechaŭ u Pałac Niezaležnaści. Vychodzić z aŭtamabila adzin, biez syna Mikałaja.
12:05
Vynosicca dziaržaŭny ściah i Kanstytucyja. Cyrymonija prachodzić pa-rusku, ale prysiaha budzie prynosicca pa-biełarusku.
12:06
Paśla ŭstupnaha słova Lidzii Jarmošynaj Alaksandr Łukašenka začytvaje prysiahu. Pamyłak nie robić.
12:07
Vykonvajecca himn, niekatoryja ŭdzielniki cyrymonii śpiavajuć, ale Jarmošyna i Łukašenka maŭčać.
12:11
Alaksandr Łukašenka padpisvaje akt ab pryniasieńni prysiahi i ŭstupleńni na pasadu prezidenta.
12:13
Pačynajucca pafasnyja pramovy. Pieršym vystupaje staršynia savieta respubliki Michaił Miaśnikovič. «Da zdravstvujet Alaksandr Łukašenka! Da zdravstvujet Biełaruś», — skančvaje pramovu jon.
Nastupny — staršynia Kanstytucyjnaha suda Piatro Mikłaševič. Takoje adčuvańnie, što pramaŭlaje tost na jubilei: «Žadaju vam žyćciovych sił!».
12:15
Mikałaj Łukašenka siadzić u zale pobač z pres-sakratarkaj Natallaj Kirsanavaj i bratam Dźmitryjem.
12:17
Alaksandr Łukašenka źviartajecca da prysutnych, kaža, što vybary byli sumlennymi. Dziakuje tym, chto hałasavaŭ za jaho.
«Narod spakojna pryjšoŭ i pakazaŭ, chto haspadar u hetym domie. Ja hanarusia, što słužu hetamu narodu», — pad apładysmienty pramaŭlaje Łukašenka.
12:20
Pakul pramova Łukašenki praciahvajecca, dla ŭdzielnikaŭ cyrymonii ŭžo padrychtavali furšet.
12:23
Łukašenka kaža, što va Ukrainie i Rasii byli nie nadta ŭdałyja reformy. Maŭlaŭ, što treba mianiać u Biełarusi? Z razdražnieńniem kaža, što ŭ kabinietach ułady hučać parady i padkazki ab reformach. Cikava, heta apielacyja kankretna da svajho daradcy Kiryła Rudaha?
12:25
Praciahvajecca «hramadzianskaja» pramova Łukašenki, a paśla ŭ jakaści hałoŭnakamandujučaha jon vyjdzie na płošču Dziaržaŭnaha ściaha. Pačniecca čas siłavikoŭ.
12:30
«Kažuć «reformy»? Davajcie złamajem achovu zdaroŭja!», — aburajecca Łukašenka. Voś što aznačaje adarvacca ad papierki…
Krytykuje achvotnikaŭ pravieści reformy ŭ pramysłovaści i sielskaj haspadarcy. Łukašenka zapeŭnivaje i siabie, i prysutnych, što jahonaja madel i tak dobra pracuje.
12:32
U pieršych šerahach siadzić palityčnaja elita. A z pravaha boku — syny kiraŭnika dziaržavy. Viktar Łukašenka adniesieny da siamji, a nie da čynoŭnikaŭ.
12:37
Čarhovaja častka vystupu — pra «palitykaŭ-radykałaŭ» i Płošču. Ale niadoŭha, bieź impetu. Prosta čarhovaje papiaredžeńnie, što kalarovyja revalucyi ŭ Biełarusi nie adbuducca.
12:45
Łukašenka narakaje, što, kali pačali narmalizavacca adnosiny ź Jeŭrasajuzam i ZŠA, lamant pajšoŭ «až da Uładzivastoka». A Jeŭropie, maŭlaŭ, nie padabajucca adnosiny Biełarusi z Rasijaj.
Łukašenka znoŭ nazyvaje Biełaruś «łapikam ziamli».
12:50
«Kali vy, biełarusy, budziecie lenavacca, ja padšturnu vas», — abiacaje Łukašenka.
12:53
«Ja zvyčajny čałaviek. … Kali i pijarusia, to biez pakazuchi». Łukašenka davodzić, što na subotnikach nasamreč pracuje. Kaža prysutnym, što nikoli im nie zdradzić.
12:57
Pieršaja častka cyrymonii praciahvałasia krychu mienš za hadzinu. Ciapier Łukašenka nakiroŭvajecca na prysiahu vajskoŭcaŭ na płoščy Dziaržaŭnaha ściaha. Telekanały tym časam pakazvajuć mini-film pra dasiahnieńni Biełarusi za časami Łukašenki.
