Uviečary 6 listapada, kala 18:00, na 29-m km aŭtadarohi R-78 «Alekšycy — Vaŭkavysk — Porazava — Pružany» adbyłosia sutyknieńnie rejsavaha aŭtobusa «Miersiedes-Spryntar», nakirunku «Salihorsk — Hrodna», jakim kiravaŭ vadziciel, 1960 hoda naradžeńnia, i nieabaznačanaha habarytnymi ahniami motabłoka pad kiravańniem žychara Vaŭkavyskaha rajona, 1976 hoda naradžeńnia. Abodva transpartnyja srodki ruchalisia ŭ adnym napramku.
Pra heta paviedamiŭ aficyjny pradstaŭnik USK pa Hrodzienskaj vobłaści Siarhiej Šaršanievič.
U vyniku darožna-transpartnaha zdareńnia abodva transpartnyja srodki źjechali ŭ kiuviet i pierakulilisia. Kiroŭca motabłoka i dźvie pasažyrki rejsavaha aŭtobusa, 1986 i 1989 hadoŭ naradžeńnia, zahinuli na miescy.
Z traŭmami roznaj stupieni ciažkaści špitalizavanyja šeść pasažyraŭ aŭtobusa, ź jakich adzin paciarpieły znachodzicca ŭ ciažkim stanie. Astatnim pasažyram nieabchodnaja miedycynskaja dapamoha akazana na miescy, paśla čaho ich adpuścili dadomu.
Upraŭleńniem Śledčaha kamiteta pa Hrodzienskaj vobłaści raspačata kryminalnaja sprava pa č.3 art.317 Kryminalnaha kodeksa Respubliki Biełaruś pa fakcie parušeńnia praviłaŭ darožnaha ruchu, jakoje paciahnuła pa nieaściarožnaści śmierć troch asob.
Pryznačany šerah ekśpiertyz. Ustaloŭvajucca i apytvajucca śviedki. Pravavaja acenka dziejańniam udzielnikaŭ darožna-transpartnaha zdareńnia budzie dadzienaja pa vynikach rasśledavańnia.
Heta druhaja surjoznaja avaryja, jakaja adbyłasia za sutki ŭ Vaŭkavyskim rajonie. Uviečary 5 listapada na 86-m kiłamietry trasy Hrodna—Ružany—Ivacevičy kiroŭca aŭtamabila Mercedes Sprinter ź nie vyśvietlenaj pakul pryčyny apynuŭsia na strečnaj pałasie, dzie sutyknuŭsia z VW. U vyniku zahinuli maci z 2-hadovym synam.
