Premjer-ministr Vialikabrytanii Devid Kemieran vysunuŭ čatyry patrabavańni Łondana na pieramovach z Brusielem ab pierahladzie ŭmoŭ členstva krainy ŭ ES.
Kemieran, u pryvatnaści, zapatrabavaŭ abarony adzinaha rynku Vialikabrytanii i inšych krain, jakija nie ŭvachodziać u zonu jeŭra; stvareńnia bolš kankurentazdolnaha ES; vyzvaleńnia Vialikabrytanii ad udziełu ŭ pracesie ruchu da «jak maha bolš ciesnaha sajuza»; błakiravańnia dla prybyłych u ES mihrantaŭ dostupu da pryvilej, pryznačanych dla pracujučych asob.
«Heta častka našych pieramovaŭ, jeŭrapiejskija lidary pavinny abaranić Vialikabrytaniju i inšyja krainy, jakija nie ŭvachodziać u jeŭrazonu», — skazaŭ jon. «ES pavinien pryznać, što heta sajuz, dzie jość bolš za adnu valutu, biez dyskryminacyi», — padkreśliŭ Devid Kemieran.
Adnosna kankurentazdolnaści premjer-ministr paviedamiŭ, što nieabchodna «sabrać razam usie roznyja prapanovy, abiacańni i pahadnieńni - pa adzinym rynku, pa handli, pa skaračeńni mier rehulavańnia — abjadnać ich u adno vyraznaje abaviazacielstva, jakoje zrobić kankurentazdolnaść častkaj struktury ES u cełym».
Havoračy ab niepryniaćci Vialikabrytanijaj pryncypu ruchu da bolš ciesnaha sajuza, Devid Kemieran skazaŭ, što jon prosić u jeŭrapiejskich lidaraŭ jasnaha, jurydyčna abaviazkovaha i nie padlahajučaha pierahladu pahadnieńnia, jakoje pakončyć z abaviazacielstvam Vialikabrytanii pracavać na stvareńnie bolš ciesnaha sajuza.
«Pryjšoŭ čas dać nacyjanalnym parłamientam bolš svabody ŭ zakanatvorčaj dziejnaści ES», — dadaŭ jon.
Što datyčycca mihracyi, to, pavodle słoŭ kiraŭnika ŭrada, Vialikabrytanii patrebny miery pa bolš strohim kantroli mihracyi z krain ES. Devid Kemieran nazvaŭ niedapuščalnym, što čystaja mihracyja (kolkaść prybyŭšych ludziej za vylikam vyjechaŭšych ź jaje) składaje 300 tys. čałaviek u hod. U pryvatnaści, pavodle słoŭ premjera, pryncyp svabody pieramiaščeńnia nie pavinien prymianiacca da novych členaŭ ES. Jon vystupiŭ za błakiravańnie dla prybyŭšych u ES mihrantaŭ dostupu da sacyjalnych vypłat i pryvilej.
Pry hetym Devid Kemieran hatovy zmahacca za zachavańnie členstva Vialikabrytanii ŭ ES, ale nie vyklučaje vychadu krainy z błoka ŭ vypadku pravału pieramovaŭ. «Ja ŭpeŭnieny, što my dasiahniom pahadnieńnia, jakoje budzie adlustroŭvać intaresy Vialikabrytanii», — skazaŭ jon, dadaŭšy, što hatovy pracavać nad dasiahnieńniem hetaj mety «z usim sercam i ŭsioj dušoj». «Ale, kali my nie dasiahniom takoha pahadnieńnia, ja ničoha nie vyklučaju», — adznačyŭ premjer-ministr.
