Ahulnalekarskaja praktyka budzie ŭkaraniacca ŭ Biełarusi paŭsiudna, zajaviła na pres-kanfierencyi 11 listapada namieśnik načalnika hałoŭnaha ŭpraŭleńnia arhanizacyi miedycynskaj dapamohi, načalnik adździeła piarvičnaj miedycynskaj dapamohi Ministerstva achovy zdaroŭja Ludmiła Žylevič.
Pavodle jaje słoŭ, ciapier dla hetaha pravodzicca pieranavučańnie ŭčastkovych terapieŭtaŭ. «My pačynajem prahramu ŭ pieršuju čarhu z navučańnia. My vučym ich paśla pracy, my vučym ich pa-za pracaj, biarom na kursy», — skazała jana.
Jak rastłumačyła śpiecyjalist, doktar ahulnaj praktyki maje pašyranyja mahčymaści ŭ paraŭnańni z učastkovym terapieŭtam. «Jaho tabiel asnaščeńnia adroźnivajecca ad učastkovaha terapieŭta, tamu što jon moža vykonvać i častkova chirurhičnyja manipulacyi, manipulacyi, źviazanyja z aftalmałahičnaj praktykaj, ŁOR-praktykaj, u jaho pašyranyja viedy ŭ halinie nieŭrałohii i inšych terapieŭtyčnych śpiecyjalnaściaŭ», — adznačyła jana.
Mahčymaści doktara ahulnaj praktyki dazvalajuć u kančatkovym vyniku dać pacyjentu toj kompleks pasłuh, jaki pazbavić jaho ad nieabchodnaści źviartacca ŭ centralnuju rajonnuju balnicu pa kansultacyju vuzkaha śpiecyjalista, skazała Žylevič. Choć u vypadku nieabchodnaści, pavodle jaje słoŭ, doktar moža nakiravać pacyjenta «na luby ŭzrovień akazańnia dapamohi», u tym liku respublikanski.
Akramia taho, adznačyła śpiecyjalist, apošnija try hady ŭ krainie pravodzicca praca pa stvareńni kamand u miežach učastkovaj słužby, jakija składajucca z doktara ahulnaj praktyki, pamočnika doktara i miedycynskaj siastry. Pamočnik doktara ŭ hetym vypadku biare na siabie častku abaviazkaŭ učastkovaha terapieŭta. Heta śpiecyjalist ź siaredniaj śpiecyjalnaj miedycynskaj adukacyjaj, jaki moža samastojna vieści pryjom pacyjentaŭ, pracuje na damu z chraničnymi pacyjentami i ŭ vypadku nieabchodnaści vyklikaje da ich doktara ahulnaj praktyki, rastłumačyła pradstaŭnik Ministerstva achovy zdaroŭja.
Śpiecyjalist nie zmahła adkazać, kali budzie zavieršana praca pa stvareńni takich učastkovych kamand. «Jak tolki budzie dastatkovaja kolkaść pamočnikaŭ doktara, kab jany zapoŭnili ŭčastkovuju słužbu. Na žal, heta adbudziecca nie za adzin dzień», — skazała jana.
Pavodle słoŭ hałoŭnaha pazaštatnaha śpiecyjalista pa piarvičnaj miedycynskaj dapamozie hałoŭnaha ŭpraŭleńnia achovy zdaroŭja Minabłvykankama Iryny Łobach, da 2017 hoda na pracu pa pryncypie doktara ahulnaj praktyki płanujecca pieravieści prykładna 97% sielskich ambułatoryj Minskaj vobłaści. Ciapier daktary ahulnaj praktyki pracujuć prykładna ŭ 73% sielskich ambułatoryj vobłaści.
