Litaralna 40 chvilinaŭ lidera abjadnanych demakratyčnych siłaŭ Alaksandra Milinkieviča pratrymali ŭ namieśnika prakurora h. Minska. Supracoŭniki Prakuratury papiaredzili palityka, što akcyja na Kastryčnickaj płoščy niedazvolenaja, i pryhrazili kryminalnaj adkazaść za ŭdzieł u Čarnobylskim šlachu.
Adznačym, što Milinkievič aficyjna nijakaha dačynieńnia da Čarnobylskaha šlachu nie maje. Zajaŭnikam źjaŭlajecca Viktar Ivaškievič, adpaviedna, usia adkaznaść uskładvajecca na jaho.
Alaksandr Milinkievič: «Heta psichałahičny cisk na nas, čarhovaja niaŭdałaja sproba zapałochać udzielnikaŭ Čarnobylskaha šlachu. Ale heta marnyja zachady. Ludzi ŭsio adno pryjduć, i my hodna, mirna projdziem Čarnobylski šlach i pamianiem usich, chto staŭ achviaraj abo zakładnikam Čarnobyla, technahiennaha abo palityčnaha. Palityčnym Čarnobylem ja b nazvaŭ toje, što siońnia robić ułada sa svaim narodam».
Alaksandr Milinkievič pryjdzie na Kastryčnicki plac u lubym vypadku, bo, pavodle jaho słovaŭ, heta asabisty abaviazak pierad tymi ludźmi, jakija pavieryli ŭ demakratyčnyja siły Biełarusi.
