Ministr zamiežnych spraŭ Biełarusi Uładzimir Makiej raźličvaje na poŭnaje źniaćcie Jeŭrasajuzam sankcyj ź Biełarusi. Ab hetym jon zajaviŭ pa vynikach sustrečy ź fiederalnym ministram zamiežnych spraŭ FRH Frankam-Valteram Štajnmajeram, jakaja adbyłasia napiaredadni ŭ Bierlinie, paviedamili ŭ pres-słužbie MZS Biełarusi.
«My vielmi zacikaŭleny ŭ narmalizacyi adnosin ź Jeŭrasajuzam. My chočam narmalnych ekanamičnych adnosin ź Jeŭrapiejskim sajuzam i asobnymi jeŭrapiejskimi krainami. Heta dapamoža nam być bolš mocnymi i ŭ palityčnym płanie», — padkreśliŭ Uładzimir Makiej.
Jon adznačyŭ, što na sustrečy adbyłosia abmierkavańnie pierśpiektyŭ raźvićcia dyjałohu pamiž Biełaruśsiu i Jeŭrapiejskim sajuzam, udziełu Biełarusi ŭ pracesach jeŭrazijskaj intehracyi, jaje ŭzajemadziejańnia z Hiermanijaj u mižnarodnych arhanizacyjach, asabliva z ulikam staršynstva Hiermanii ŭ ABSIE ŭ 2016 hodzie, šeraha aktualnych prablem mižnarodnaj palityki. «Ja spadziajusia, što ŭ abmierkavańni ŭsich prablem my dasiahnuli ŭzajemarazumieńnia», — skazaŭ kiraŭnik MZS Biełarusi.
«My spakojna hladzim u budučyniu, i, ja dumaju, my hladzim u adnym i tym ža napramku. Heta vielmi važna, tamu što ŭ minułym mnohaje było. Byŭ pieryjad sankcyj, jakija nie ŭnieśli pazityŭnaha ŭkładu ŭ raźvićcio našaj krainy, — adznačyŭ Uładzimir Makiej. — Ja spadziajusia, što ŭ budučym hetyja sankcyi buduć źniaty, i heta dapamoža nam pradoŭžyć raźvićcio krainy va ŭsich napramkach — palityčnym, ekanamičnym, u śfiery pravoŭ čałavieka i inšych».
«Samaje hałoŭnaje, što abodva baki zacikaŭleny ŭ tym, kab Biełaruś padtrymlivała narmalnyja adnosiny ź Jeŭrasajuzam. I ja dumaju, što heta sustreča vielmi važnaja dla našaha budučaha», — dadaŭ jon.
