Heta adziny dziaržaŭny ruskamoŭny teatr u Litvie. Jaho akciory nie raz naviedvali z hastrolami Biełaruś, udzielničali ŭ teatralnych fiestyvalach. Sioletnija hastroli RDTŁ u Minsku projduć u hod 70-hodździa teatra.
Na scenie Biełaruskaha dziaržaŭnaha akademičnaha muzyčnaha teatra litoŭskija artysty pakažuć novyja pastanoŭki sa svajho repiertuaru. Adkryje hastrolnuju afišu RDTŁ u Minsku «Zojkina kvatera» pavodle pjesy Michaiła Bułhakava. «Kałarytny siužet z sočnym tekstam i mnostvam pieraapranańniaŭ z časoŭ nepa — taho karotkaha problisku nadziei ŭ pieradvajennaj balšavickaj Rasii, kali ludzi śpiašalisia žyć, rabić nierazumnaści i ŭdychnuć poŭnymi hrudziami apošni hłytok nieŭtajmavanych pačućciaŭ» — tak anansujuć pastanoŭku hości.
Druhi śpiektakl pakažuć 26 listapada — ekscentryčny muzyčny śpiektakl pavodle pjesy Alaksandra Uviadzienskaha «Jołka ŭ Ivanovych», jaki čatyry razy adznačany najvyšejšaj teatralnaj uznaharodaj Litvy — «Załatym sceničnym kryžam». Takoj ža ŭznaharody ŭdastojenaja muzyka da śpiektakla «Jaŭhien Aniehin», jaki budzie pakazany 27 listapada. Listapadaŭskija hastroli ŭ Minsku RDTŁ zavieršyć svaim samym ambicyjnym i maštabnym śpiektaklem — trahiedyjaj Uiljama Šekśpira «Karol Lir» u pastanoŭcy kiraŭnika teatra režysiora Jonasa Vajtkusa.
U hetyja ž dni ŭ Vilni na scenie Ruskaha dramatyčnaha teatra Litvy budzie vystupać kalektyŭ Biełaruskaha dziaržaŭnaha akademičnaha muzyčnaha teatra. Jon pakaža kancertnuju prahramu «Štraus-hała», muzyčnuju kamiedyju Jaŭhiena Pcičkina «Babski bunt», vadevil Uładzimira Baskina «Sapraŭdnaja historyja paručnika Ržeŭskaha» i muzyčnuju kamiedyju Uładlena Łukašova i Vadzima Iljina «Maja žonka — łhuńnia».
