Siońnia nabyvaje moc pahadnieńnie ab biaźvizavym režymie pamiž Biełaruśsiu i Izrailem. Vizy admienienyja dla hramadzian, jakija padarožničajuć z turystyčnaj metaj. Mižuradavaje pahadnieńnie ab admienie viz krainy padpisali 19 vieraśnia 2014 hoda.
Mižuradavaje pahadnieńnie ab admienie viz krainy padpisali 19 vieraśnia 2014 hoda. U adpaviednaści z artykułam 7 pahadnieńnia dakumient nabyvaje moc praz 90 dzion paśla atrymańnia pa dypłamatyčnych kanałach apošniaha piśmovaha apaviaščeńnia, jakim baki infarmujuć adzin adnaho ab vykanańni ŭsich nieabchodnych unutrydziaržaŭnych pracedur.
Biełaruski bok jašče ŭ studzieni 2015 hoda prainfarmavaŭ izrailskich kaleh pra vykanańnie ŭsich praduhledžanych pracedur. Zatrymka ratyfikacyi pahadnieńnia Izrailem była źviazanaja z praviadzieńniem u hetaj krainie 17 sakavika daterminovych parłamienckich vybaraŭ. Admienu vizavaha režymu ź Biełaruśsiu kabiniet ministraŭ Izraila zaćvierdziŭ 16 žniŭnia.
Jak rastłumačyła BiełaPAN časovy pavierany ŭ spravach Izraila ŭ Biełarusi Julija Račynski, vizy admienienyja tolki dla tych hramadzian, jakija padarožničajuć z turystyčnaj metaj. «Dla pajezdak ź inšaj metaj dahetul patrabujecca viza», — dadała jana.
Jakija-niebudź dadatkovyja dakumienty dla turystyčnaj pajezdki ŭ Izrail, pavodle słoŭ Račynski, biełaruskim hramadzianam brać nie abaviazkova. «Paŭnamoctvy pa sankcyjanavańni ŭjezdu ŭ Izrail pierachodziać ad pasolstva da pahraničnaj słužby, i kali ŭ ludziej jość niejkija apaski, jany mohuć uziać z saboj abo numar paśviedčańnia asoby hramadzianina Izraila, jaki ich zaprašaje, abo kopiju paśviedčańnia asoby dla prad`iaŭleńnia pahraničnikam», — skazała dypłamat. Astatnija dakumienty biełaruskija hramadzianie mohuć brać pa svaim mierkavańni. U pryvatnaści, turysty mohuć dadatkova pradstavić pahraničnikam turystyčnuju prahramu, paćviardžeńnie braniravańnia hatela. «Iznoŭ-taki, heta nie aficyjnaje patrabavańnie — heta rekamiendacyja tym, u kaho jość niejkija apaski i chto choča pierastrachavacca», — adznačyła Račynski.
Pavodle jaje słoŭ, pytańni ŭ pahraničnikaŭ mohuć ź`iavicca da ludziej, jakija niadaŭna ŭziali šlub z hramadzianami Izraila. «My rekamiendujem im afarmlać zaprašeńnie praz MUS Izraila», — adznačyła časovy pavierany.
Jana taksama padkreśliła, što ŭ vypadku admovy va ŭjeździe ŭ Izrail u biełaruskich hramadzian budzie mahčymaść na praciahu dvuch sutak abskardzić heta rašeńnie. Turystam rekamiendujecca pierad pajezdkaj daviedacca numar telefona konsulskaha adździeła biełaruskaha pasolstva ŭ Izraili, kab mieć mahčymaść źviarnucca pa jurydyčnuju dapamohu ŭ vypadku nieabchodnaści.
Račynski taksama paviedamiła, što pytańnie ab zakryćci pasolstva Izraila ŭ Biełarusi pakul nie vyrašana. «Spadziajemsia, što rašeńnie da kanca hoda budzie pryniata, i my budziem dakładna viedać, ci praciahnie pasolstva svajo isnavańnie. Pakul my pracujem, jak i pracavali dahetul», — zajaviła dypłamat.
Nahadajem, 4 žniŭnia hetaha hoda ŭrad Izraila padtrymaŭ prapanovu prem`ier-ministra Bińjamina Nietańjachu ab likvidacyi siami dypłamatyčnych pradstaŭnictvaŭ u suviazi sa skaračeńniem vydatkaŭ. U liku dyppradstaŭnictvaŭ, zapłanavanych da skaračeńnia, izrailski prem`ier nazvaŭ i pasolstva ŭ Biełarusi.
Krychu paźniej były izrailski pasoł u Biełarusi Iosif Šahał paviedamiŭ BiełaPAN, što ŭ MZS Izraila stvorana kamisija pa vyvučeńni pytańnia ab skaračeńni siami dyppradstaŭnictvaŭ u śviecie. Ci zakranie heta skaračeńnie pasolstva ŭ Biełarusi, nieviadoma, dadaŭ Šahał.
Dypłamatyčnaja misija Iosifa Šahała ŭ Biełarusi zaviaršyłasia ŭ kancy žniŭnia. Kali ŭ Biełaruś prybudzie novy pasoł Izraila, pakul nieviadoma, paviedamiła Julija Račynski.
