Pa siarednim zarobku Biełaruś zajmaje ŭ Jeŭropie treciaje miesca z kanca, jon mienšy tolki va Ukrainie i Małdovie.
350 jeŭra «brudnymi» – toje, što mahła prapanavać biełaruskaja ekanomika ŭ kastryčniku.
Z advarotnaha boku rejtynhu Šviejcaryja i Narviehija. U skandynaŭskaj krainie siaredni zarobak amal dasiahaje 4500 jeŭra. Heta ŭ 12 razoŭ bolš, čym u Biełarusi!
Viadoma ž, ceny taksama nie ŭ prykład biełaruskim. Kaśmičnyja ceny na tavary i asabliva na pasłuhi ŭ Narviehii – nie mif. Ale ci zachoŭvajecca taja samaja praporcyja – 12:1 – u cenach?
Dla paraŭnańnia my pierapisali ceny ŭ adnoj z kramaŭ narviežskaj sietki «Kivi». Pad takim brendam pracuje bolš za 500 supiermarkietaŭ. «Kivi» ličycca adnoj z samych tannych sietak, u Biełarusi jaje adpaviednikam možna nazvać «Jeŭraopt».
Typovaja krama «Kivi» ŭ Lilechamiery – miastečku na 25 tysiač čałaviek, jakoje prasłaviłasia zimovaj Alimpijadaj.
Takim čynam, na kolki narviežskija pradukty daražejšyja?
| Pradukt | Cana ŭ Narviehii | Cana ŭ Biełarusi | Roźnica |
| Rys, 1 kh | 16 500 | 9900 | 1,7 razu |
| Spahieci, 1 kh | 19 100 | 9300 | 2,1 razu |
| Jajki, 10 št | 65 800 | 15 900 | 4,1 razu |
| Małako, 1 ł | 25 300 | 7500 | 3,4 razu |
| Kurynaje file, 1 kh | 220 400 | 62 000 | 3,6 razu |
| Banany, 1 kh | 35 100 | 16 900 | 2,1 razu |
| Vinahrad, 1 kh | 72 500 | 44 900 | 1,6 razu |
| Jabłyki, 1 kh | 62 100 | 14 300 | 4,3 razu |
| Liptan, 25 pakiecikaŭ | 51 000 | 23 900 | 2,1 razu |
| Neskafe Gold, 95 h | 102 900 | 66 000 | 1,6 razu |
| Jabłyčny sok, 2 ł | 27 000 | 23 500 | 1,1 razu |
Z advolna ŭziataha śpisu niama nivodnaha tavaru, jaki b u Narviehii byŭ tańniejšym. Amal zraŭniaŭsia pa canie biełaruski i skandynaŭski niektar. Nievialikaja roźnica i ŭ krupach. Hetyja tavary pradavalisia ŭ Narviehii pa akcyi «pieršaja cana». Kali dačakacca źnižak na inšyja tavary, možna charčavacca davoli tanna.
Blašanka kašačych kansiervaŭ pa «Pieršaj canie» kaštuje roŭna 10 tysiač rubloŭ (1 narviežskaja krona — 2129 biełaruskich rubloŭ). Palicy abstalavanyja elektronnymi ceńnikami. Da Biełarusi hetaje nou-chau tolki dabirajecca.
Najbolšaja roźnica ŭ cenach na miasnuju i małočnuju pramysłovaść. U Narviehii, jak i ŭ bolšaści krain Jeŭropy, sielskahaspadarčyja pradpryjemstvy nie majuć datacyj ad uradu. Ale navat na ich pradukcyju roźnica cany nie pieravyšaje 5 razoŭ, tady jak roźnica zarobkaŭ – 12 razoŭ…
Piva pradajecca ŭ drobnych blašankach, pa 0,33 ł. Kaštuje kala 21 tysiačy rubloŭ.
Pry hetym navat u darahich krainach možna znajści tavary, jakija za košt klimatyčnych umovaŭ i asablivaściaŭ rynku stanoviacca zvyšdastupnymi. Naprykład, u rybnaj Narviehii zamarožanyja krevietki možna nabyć usiaho za 95 tysiač rubloŭ za kiłahram.
