Jašče raz pra staryja dyski. Jurja. «Kali-čakra».
Jury Vydronak — lider Ur'ia, były mastacki kiraŭnik «Pałacu» i «Kryvi», udzielnik pieršaha składu «Trojcy» -- čałaviek nia duža publičny, chacia, mažliva, dziakujučy jamu pra našuju krainu ŭ śviecie buduć viedać niešta, aproč Łukašenki i Čarnobylu.
Pamiataju, u adnym interviju abiacaŭ Jury zapisać novy albom całkam praź lampavy aparat u viaskovaj draŭlanaj chacie. Nia viedaju dakładna, ci vyjšła, ale duža na toje padobna. Novaja płytka nasamreč bolš ciopłaja, chatniaja — ad jaje patychaje ŭtulnym ahniom, jak ad dobra natoplenaj piečki.
Admysłova dla dzietak, pry padtrymcy JUNESKA, zroblenaja «Kurka-Riabuška», ad jakoj vusny sami pačynajuć składacca va ŭśmiešku.
Najlepšaja, jak dla mianie, pieśnia albomu — całkam aŭtarski tryler «Na Vielikodni». Folkavyja napievy i matyvy tak ujelisia ŭ mozh Jurju, što jon sam pačaŭ stvarać zvyšarhaničny ńju-folk. Paśla TAKOHA pavieryš, što biełarusy vynajšli rok-n-roł. Jak kazała znajomaja paetka — adrazu možna adčuć, ci jość u paeta kantakt z padśviadomaściu. U muzyki-Vydronka jon vidavočna jość.
«Rusałki» pačynajucca mistyčnym dyktafonnym zapisam z čarhovaj falklarysckaj ekspedycyi, pra mierćviakoŭ, jakija śpiavajuć rusalčyny pieśni...
Jość na albomie i znakamitaja indaeŭrapiejskija «Kali-čakra» — zapisanaja niekali dla Eŭrabačańnia. Asablivy kalaryt stvaraje spałučeńnie žalejki Vydronka i sitara Jurja Siŭca.
Kaniečnie, kab heta zrazumieć, treba pahruzicca — i heta całkam biaśpiečna, u adroźnieńnie ad toj ža «Manaški». Jura žyvie na svajoj aryjskaj planecie, amal nie źviazanaj ź biełaruskim «šoŭbizam». Tamu, vidać, i ŭdajecca ŭ jaho abhaniać heny šoŭbiz na dźvie hałavy. Ur'ia — žadany hość na zachodnich folk-festach. Na dadadzienym videa možna bačyć šoŭ eŭrapiejskaha ŭzroŭniu.
Ur'ia pierastvaraje biełaruskaje minułaje, zakidajučy pačatak našaj historyi ŭ dalokija pieramožnyja praaryjskija časy, dalokija ad Rahvałoda i Rahniedy. Jak i jahony papiarednik u mastactvie, Jazep Drazdovič (čyje malunki iznoŭ vykarystanyja na vokładcy), Jury pracuje na budučyniu...
Viedajučy, jak pracujuć pradaŭcy ŭ biełaruskich muzyčnych kramach, paŭtaraju – kuplać, kuplać, kuplać. Nie sabie, dyk dzietkam. I ŭnukam.
