Vice-prezident ZŠA Džo Bajden pahutaryŭ z premjer-ministram Arsienijem Jacaniukom pa telefonie, havorycca ŭ paviedamleńni pres-słužby Biełaha Doma.
«Džo Bajden abmierkavaŭ ź Jacaniukom važnaść palityčnaha adzinstva i ruch napierad u nakirunku reformaŭ. Vice-prezident asudziŭ napad na premjer-ministra ŭ Radzie», — skazana ŭ zajavie.
Jon zaklikaŭ ŭkrainskich deputataŭ pakinuć «rytoryku prociborstva», što tolki pieraškadžaje reformam, jakija «narod Ukrainy zasłužyŭ».
Džo Bajden abmierkavaŭ z Arsienijem Jacaniukom padrychtoŭku reformy dziaržaŭnaj słužby.
U piatnicu ŭ Viarchoŭnaj Radzie deputat z frakcyi BPP (Błok Piatra Parašenki «Solidarnisť») Aleh Barna sprabavaŭ ściahnuć z trybuny premjer-ministra Arsienija Jacaniuka padčas jaho vystupu.
Fota UNIAN
Napad na Arsienija Jacaniuka ŭ Viarchoŭnaj Radzie staŭ adnoj z hałoŭnych tem suśvietnych ŚMI ŭ piatnicu. Paśla hetaha incydentu ŭ ścienach parłamienta zaviazałasia bojka. Aleh Barna vyklučany sa składu frakcyi, i heta rašeńnie publična padtrymaŭ Piatro Parašenka.
Uviečary ŭ piatnicu frakcyja premjera «Narodny front» sustrełasia z prezidentam Piatrom Parašenkam i abmierkavała dalejšaje supracoŭnictva.
Znachodziačysia va Ukrainie, Džon Bajden namiaknuŭ, što mianiać kiraŭnika ŭrada ciapier niavarta.
«Sustreŭsia sa śpikieram Viarchoŭnaj Rady Hrojsmanom, prezidentam Parašenkam i premjer-ministram Jacaniukom… i ja vieru, što pracujučy razam, jany zmohuć stvaryć sapraŭdy svabodnuju, abjadnanuju i demakratyčnuju Ukrainu», — adznačyŭ Bajden.
