Supracoŭnikami adździeła pa raskryćci złačynstvaŭ u śfiery vysokich technałohij UUS Viciebskaha abłvykankama vyjaŭlenaja mižharodniaja hrupa, jakaja zajmałasia raspaŭsiudžvańniem škodnaha prahramnaha zabieśpiačeńnia. Arhanizatarami machlarskaj kibiersietki akazalisia dvoje maładych žycharoŭ Viciebskaj vobłaści i hramadzianin Rasii.
Jak paviedamlaje UUS Viciebskaha abłvykankama, idejnym natchnialnikam i hałoŭnym u złačynnaj hrupie byŭ były student, jaki atrymlivaŭ u svoj čas adnu z IT-śpiecyjalnaściej. Davučycca da kanca nie zachacieŭ i kinuŭ VNU.
Razam z chaŭruśnikami jon raspracavaŭ prybytkovuju kryminalnuju schiemu. Na samych roznych sajtach jany raźmiaščali rekłamu, pry naciskańni na jakuju karystalnik internetu, jaki ničoha nie padazravaŭ, traplaŭ u kibierłavušku. Škodnaja prahrama błakiravała braŭzier achviary, a ŭ dyjałohavym aknie źjaŭlałasia paviedamleńnie nibyta ad imia MUS ab nakładańni štrafu za prahlad parnahrafičnych materyjałaŭ. Hrošy za štraf achviary padmanu pavinny byli pieravieści na ŭkazany ŭ paviedamleńni abaniencki numar.
Tolki za miesiac achviarami machlaroŭ stali bolš jak 200 čałaviek z usioj Biełarusi.
Arhanizatar złačynnaha biźniesu zatrymany.
Milicyjaniery praciahvajuć pracu pa vyjaŭleńni achviaraŭ machlaroŭ. Usim hramadzianam, jakija paciarpieli ad dziejańniaŭ złačynnaj hrupy, rekamiendujecca paviedamić pra heta.