Efiektyŭnym adkazam na biesprecedentnyja represii z boku administracyi BDU stała salidarnaść.
Pra heta ŭ efiry prahramy «Dva na dva» telekanała «Biełsat» zajaviŭ aktyvist studenckaha ruchu Dźmitryj Hamianiuk. Jon raspavioŭ ab naradžeńni salidarnaści navučencaŭ, ab tym jak studenty sumiesnymi namahańniami spynili represii administracyi BDU, a taksama zavočna adkazaŭ ułaśniku tut.by Juryju Zisieru na krytyku studentaŭ, jakija zmahajucca za svaje pravy.
«Vy sapraŭdy vierycie, što dvoječniki za 40 tysiač na siemiestr hatovyja zmahacca za svaje pravy, padstaŭlacca pad represii i ryzykavać svaim navučańniem u VNU?» — rytaryčna pytajecca Źmicier Hamianiuk.
Ź jahonych słoŭ, dla Biełarusi studencki pratest suprać płatnych adpracovak — nie adziny vypadak, adnak na hety raz navučency BDU navažyli pajści da kanca. Efiektyŭnym adkazam na biesprecedentnyja represii z boku administracyi stała salidarnaść.
«Na ŭdzielnika studenckaha pratestu Hleba Vajkula stała cisnuć kiraŭnictva ŭniviersitetu. Byŭ apublikavany zaklik telefanavać u dekanat i prajaŭlać salidarnaść. U vyniku było blizu 50-80 zvankoŭ ad roznych ludziej. Urešcie dekanat nie vytrymaŭ «Boža, chopić telefanavać, spyniciesia!» - prasili supracoŭniki BDU», — raspaviadaje Źmicier Hamianiuk.
Roznahałośsi pamiž studentami i administracyjaj BDU pačalisia paśla taho, jak u VNU ahučyli płany ŭvieści apłatu za pierazdaču zalikaŭ i ispytaŭ. Univiersiteckuju moładź aburyła takaja pierśpiektyva. Studenty sabrali suprać novaŭviadzieńnia bolš za 2500 podpisaŭ, a ŭ sacyjalnych sietkach paŭstali pratestnyja hrupy. Jaje ŭdzielniki paviedamili pra namier zajavić na VNU ŭ prakuraturu, kali apłata za pierazdačy budzie ŭviedzienaja.
Niahledziačy na pratesty, 12 listapada rektar BDU padpisaŭ pałažeńnie ab płatnych pierazdačach.
Dniom 2 śniežnia ŭ rajonie staličnaj płoščy Niezaležnaści prajšoŭ studencki marš. Svajoj akcyjaj udzielniki chacieli damahčysia ad kiraŭnictva BDU skasavańnia płatnych pierazdač i adpracovak, spynieńnia cisku na studentaŭ, rospusku Asamblei BDU i stvareńnia novaha orhana studenckaha samakiravańnia.
Na nastupny dzień student fiłałahičnaha fakulteta BDU Hleb Vajkul, jaki ŭdzielničaŭ u studenckim maršy, atrymaŭ vusnaje papiaredžańnie dekanata za propuski zaniatkaŭ. Takuju pastanovu na svaim pasiadžeńni pryniali siabry niadaŭna stvoranaj u VNU kamisii propuskaŭ zaniatkaŭ.
