Na adnym z rasijskich čarnasocienskich sajtaŭ niadaŭna źjaviŭsia materyjał, u jakim aŭtary razhałošvajuć pryvatnyja źviestki pra aŭtara ŭkrainska-biełaruskaha resursu «InformNapalm», hrodzienca Dzianisa Ivašyna.
Dzianis Ivašyn viadomy tym, što šlacham analizu adkrytych krynic vykryvaŭ datyčnaść da Rasii ŭdzielnikaŭ bajavych dziejańniaŭ na Danbasie. Akramia taho, Infarmnapałm ažyćciaviŭ supiarečlivaje raskryćcio imion i adrasoŭ rasijskich lotčykaŭ, što ŭdzielničajuć u bambiožkach Siryi.
Taksama čarnasociency apublikavali chatnija adrasy Dzianisa, numary mašyn, jakija jamu naležać (jak pradprymalniku) i navat hod šlubu jahonaj maci!
Frahmient «rasśledavańnia» z sajta čarnasociencaŭ.
Čarnasociency zajaŭlajuć, što skarystalisia ivašynskaj ža taktykaj i «naryli» u adkrytych krynicach masu infarmacyi pra Dzianisa.
Ale ž źviestki pra numary mašyn, poŭnaje imia jahonaha ajčyma i hod šlubu maci nielha adšukać, nie majučy dostupu da admysłovych bazaŭ.
Inačaj kažučy, chtości «źliŭ» čarnasociencam pryvatnuju infarmacyju pra čałavieka.
«Samaje paskudnaje ŭ hetym paskvili toje, što čapajuć maich baćkoŭ, — skazaŭ Dzianis Ivašyn «Našaj Nivie», — asabliva kazki pra toje, što moj baćka źjechaŭ ad nas z maci ŭ Maskvu. Moj baćka pamior niekalki hadoŭ tamu!»
(Aŭtary śćviardžajuć, što baćka biełarusa «nie vytrymaŭ «śviadamizmu» syna i žonki i źjechaŭ ad ich u Maskvu.)
Inšyja detali: u apisańni biznesu Ivašyna (toj zdaje ŭ arendu mašyny) čarnasociency spasyłajucca na niehatyŭnyja kamientary da jakaści absłuhoŭvańnia, jakija źjavilisia na roznych sajtach jašče dva miesiacy tamu, pry hetym — u adzin dzień. Napisanyja jany ŭ adnym styli.
«Hety paskvil čarhovaha razu davioŭ, z kim my majem dačynieńnie — z cyničnym i padstupnym voraham, jaki praź mietody šalmavańnia, ačarnieńnia sprabuje dyskredytavać svajho supraciŭnika», — kaža Dzianis.
«Bližejšymi dniami ja vyrašu, ci varta pisać u prakuraturu prośbu pravieryć, jakim čynam aŭtary atrymali dostup da zakrytaj infarmacyi», — dadaje taksama Dzianis.
Razam z hetym juryst-viasnoviec Pavieł Sapiełka patłumačyŭ «Našaj Nivie», što asabistyja źviestki kštałtu proźviščaŭ i numaroŭ aŭto nie składajuć ź siabie tajamnicu i nie achoŭvajucca. Ale, kali ich niama ŭ adkrytym dostupie i hetyja źviestki atrymanyja ad słužbovaj asoby, to heta ŭžo słužbovaje pravaparušeńnie.
«Zabaronienyja i ciahnuć kryminalnuju adkaznaść niezakonnyja źbirańnie albo raspaŭsiudžvańnie źviestak ab pryvatnym žyćci, jakija składajuć asabistuju ci siamiejnuju tajamnicu inšaj asoby, bieź jaho zhody, i jakija paciahnuli pryčynieńnie škody pravam, svabodam i zakonnym intaresam paciarpiełaha», — dadaŭ taksama Pavał Sapiełka.
