Pryblizna miesiac tamu na płatformie padtrymki sacyjalnych prajektaŭ Talaka.by startavała kraŭdfandynhavaja kampanija «Słoŭnik «Naš dom / Our Home». Metaj inicyjatyvy jość sabrać 43 000 000 rubloŭ dla vydańnia pieršaha biełaruska-anhlijskaha tematyčnaha słoŭnika ŭ malunkach.
Udzielniki prajekta bačać «Naš dom / Our Home» jaskravaj knihaj dla dziaciej i darosłych, dla biełarusaŭ i zamiežnikaŭ, dla vučoby i zabavy. U słoŭniku buduć «namalavanyja» kala 1000 budzionnych słovaŭ i razmoŭnych frazaŭ na kožnaj movie z transkrypcyjami dla tych, chto sumniavajecca ŭ pračytańni. Materyjał knihi budzie zhrupavany pryblizna ŭ 25 tematyčnych raździełaŭ: «Častki žyłoha budynka / Parts of a residential building», «U vitalni / In the entrance hall», «U haścioŭni / In the living room», «U spalni / In the bedroom», «U dziciačym pakoi / In the nursery», «Na kuchni / In the kitchen», «Za stałom / At the table», «U kamory / In the pantry», «Chatniaja haspadarka / Household affairs», «Ramont / Repairs», «Chatnija hadavancy / Pets» i inš.
Słoŭnik układajuć prafiesijnyja pierakładčycy i movaznaŭcy, mahistry humanitarnych navuk BDŁU i BDU. Jość damoŭlenaść z vydaviectvam «Halijafy» ab vydańni knihi ŭviesnu 2016 hoda.
«Hrašovuju padtrymku kampanii «Naš dom / Our Home« možna ličyć kaladnym daram dla biełaruskich školnikaŭ i nie tolki», – kaža kiraŭnica prajekta Alena Jałavienka. – Dźvie traciny patrebnaj dla vydańnia słoŭnika sumy ŭžo paabiacali budučyja fundatary, i my zaklikajem inšych paspalitych ludziej Biełarusi da 20 śniežnia spryčynicca da źjaŭleńnia hetaj unikalnaj malavanaj knihi».
Stać «žycharami»-fundatarami «Našaha doma», jak śćviardžajuć udzielniki prajekta, dosyć lohka. Dla hetaha treba
1) da 20 śniežnia zarehistravacca na www.talaka.by i na staroncy kampanii nacisnuć na knopku «Padtrymać finansava»;
2) vyznačycca z sumaj achviaravańnia i paabiacać jaje na sajcie (darečy, pa vydańni knihi ŭsie fundatary na sumu 200 000 i bolej bieł. rub., atrymajuć padarunki z vyjavami z «Našaha doma»: sami słoŭniki, postery, pazły i inš.;
3) z 21 da 30 śniežnia atrymać pa elektronnaj pošcie nahadvańnie i pieradać abiacanuju sumu hatoŭkaj abo praz PayPal.
