Alaksandr Łukašenka 18 śniežnia padpisaŭ ukaz №504 «Ab zadačach sacyjalna-ekanamičnaha raźvićcia Respubliki Biełaruś na 2016 hod», paviedamili ŭ pres-słužbie biełaruskaha lidara.
Kiraŭnikom dziaržavy vyznačanyja klučavyja pakazčyki efiektyŭnaści raboty ŭrada Biełarusi i Nacyjanalnaha banka ŭ jakaści najvažniejšych paramietraŭ prahnozu sacyjalna-ekanamičnaha raźvićcia krainy na 2016 hod, siarod jakich zabieśpiačeńnie tempaŭ rostu da ŭzroŭniu 2015:
- vałavoha ŭnutranaha praduktu nie mienš za 100,3%;
- pradukcyjnaści pracy nie mienš za 101,5%;
- ekspartu tavaraŭ i pasłuh nie mienš za 103,5%;
- realnych najaŭnych hrašovych dachodaŭ nasielnictva nie mienš za 100,5%.
Savietu Ministraŭ daručana vyznačyć klučavyja pakazčyki efiektyŭnaści raboty kiraŭnikoŭ ministerstvaŭ, kancernaŭ, abłvykankamaŭ i Minskaha harvykankama, a taksama arhanizacyj, majomaść jakich znachodzicca va ŭłasnaści dziaržavy abo ŭ statutnych fondach jakich 50% i bolš akcyj naležyć dziaržavie, akramia mikraarhanizacyj i arhanizacyj z udziełam zamiežnaha kapitału. Pry hetym nie dapuskajecca daviadzieńnie arhanizacyjam inšych pakazčykaŭ, a taksama daviadzieńnie pakazčykaŭ arhanizacyjam, nie nazvanym va ŭkazie.
Savietu Ministraŭ pastaŭlenaja zadača zabiaśpiečyć da 1 sakavika 2016 hoda raspracoŭku arhanizacyjami detalovaha płana mier pa źnižeńni vydatkaŭ na vytvorčaść tavaraŭ (rabot, pasłuh) na 2016 hod.
Jak adznačyli ŭ pres-słužbie, realizacyja mier pa zabieśpiačeńni makraekanamičnaj stabilnaści dazvolić źnizić upłyŭ ad niespryjalnaj źniešnieekanamičnaj kanjunktury i zabiaśpiečyć ustojlivaje ekanamičnaje raźvićcio Biełarusi.
