4 śniežnia Alaksandr Łukašenka admianiŭ svoj vizit na AAT «Kamvol», bujnoha vytvorcu tekstylnaj pradukcyi, što znachodzicca ŭ Minsku.
Łukšenka asudziŭ sproby kiraŭnictva «Kamvola» prykryć isnujučyja tam prablemy pierad zapłanavanym vizitam, i pryhraziŭ zrabić inšy niečakany vizit na pradpryjemstva ŭ budučyni.
Za apošnija siem hadoŭ «Kamvol» atrymaŭ bolš za 100 młn jeŭra dziaržaŭnych subsidyj, ale nie skončyŭ ni adnaho hoda z prybytkam. Kolkaść pracaŭnikoŭ pradpryjemstva na praciahu hetaha pieryjadu skaraciłasia ŭdvaja.
Zaniapad pradpryjemstva adlustroŭvaje los mnohich padobnych pradpryjemstvaŭ u Biełarusi. Paśpiachovyja ŭ saviecki pieryjad, vytvorcy tekstylu ŭ Biełarusi zmahajucca za isnavańnie i stračvajuć klijentaŭ, jakich pierajmajuć zamiežnyja kampanii. I tym nie mienš, ułady praciahvajuć ich subsidavać, niahledziačy na niehatyŭnyja finansavyja pakaźniki.
Zaniapad savieckaha hihanta
«Kamvol» byŭ zasnavany ŭ 1955 hodzie i kvitnieŭ, pakul Biełaruś znachodziłasia ŭ Savieckim Sajuzie. Na praciahu hetaha času pradpryjemstva vyrablała da 22 miljonaŭ mietraŭ tkaniny ŭ hod. Siońnia «Kamvol» vyrablaje ŭ 10 razoŭ mienš tkaniny i sutykajecca z realnaj mahčymaściu zakryćcia.
Pamiž 2009 i 2014 hadami kolkaść supracoŭnikaŭ Kamvola źniziłasia ŭdvaja, dasiahnuŭšy 797 čałaviek. Uličvajučy ahulnuju depresiju ŭ ekanomicy, pracoŭnaja siła pradpryjemstva, mahčyma, u 2015 hodzie skaraciłasia jašče bolš.
Pa dadzienych Ministerstva finansaŭ, «Kamvol» skončyŭ 2014 z čystaj strataj u pamiery 1 młn jeŭra. Adzinym hodam, u jakim straty byli niaznačnymi, byŭ 2011. Mienavita tady Biełaruś ździejśniła patrojenuju devalvacyju, što pryviało da źnižeńnia koštaŭ na biełaruskija tavary na suśvietnym rynku.
Prablemy «Kamvola» stali najbolš vostrymi zimoju 2012 hoda, kali Alaksandr Łukašenka naviedaŭ pradpryjemstva.
Padčas hetaha vizitu tempieratura ŭ pamiaškańniach pradpryjemstva vahałasia kala nula hradusaŭ pa Celsii, bo aciapleńnie prastory z 13-mietrovaj stollu było zanadta darahim. Pravierka taksama vyjaviła, što abstalavańnie «Kamvola» ŭ 95% vypadkaŭ sastareła.
Razzłavaŭšysia na harotny stan pradpryjemstva, Łukašenka zvolniŭ jaho kiraŭnictva i kiraŭnictva kancerna lohkaj pramysłovaści.
Madernizacyja «Kamvola»
Navat znachodziačysia na miažy bankructva, kampanija zastajecca adnym z najbujniejšych vytvorcaŭ tkaniny ŭ byłym Savieckim Sajuzie. «Kamvol» taksama zajmaje značnaje miesca ŭ lohkaj pramysłovaści Biełarusi. Ale dla taho, kab vyžyć, pradpryjemstvu nadzvyčaj patrebnaja madernizacyja.
Biełaruskija ŭłady płanavali madernizavać «Kamvol» na praciahu niekalkich hadoŭ. Łukašenka nieadnarazova ŭzdymaŭ hetaje pytańnie na sustrečach z kiraŭnictvam kampanii. Paśla taho, jak Łukašenka admoviŭsia naviedać «Kamvol» i zajaviŭ, što jaho kiraŭnictva sprabavała schavać isnujučyja prablemy, jon pravioŭ jašče adnu sustreču pa stanie pradpryjemstva. Pa vynikach sustrečy było abvieščana pra dadatkovuju dapamohu «Kamvolu» ŭ pamiery 5 młn jeŭra.
Za apošnija vosiem hadoŭ «Kamvol» atrymaŭ ad dziaržavy bolš za 100 młn jeŭra. Ale, niahledziačy na ščodruju padtrymku, kampanija zastajecca stratnaj.
Jon maje finansavyja ciažkaści z tych ža pryčyn, što i mnohija inšyja vytvorcy tekstylu na postsavieckaj prastory, jakija vychodziać z hetaha biznesu. Tutejšyja kampanii nie mohuć kankuravać z azijackimi i tureckimi vytvorcami. Naprykład, Ivanaŭskaja tekstylnaja fabryka ŭ Rasii zbankrutavała jašče ŭ 2001 hodzie.
Tym nie mienš, u adroźnieńnie ad anałahičnych kampanij u inšych postsavieckich dziaržavach, dva dziasiatki biełaruskich dziaržaŭnych vytvorcaŭ tekstylu praciahvajuć pracavać, abapirajučysia na dziaržaŭnyja subsidyi. Jak i «Kamvol», hetyja kampanii pakazvali najlepšy vynik u 2011 hodzie, kali biełaruski rubiel devalvavaŭsia. Ale, u adroźnieńnie ad 2011 hoda, ciapierašni kryzis tyčycca i ekanomiki Rasii- - Maskvie brakuje hrošaj dla kupli biełaruskich tekstylnych vyrabaŭ.
Usia tekstylnaja pramysłovaść, na dolu jakoj prypadaje 3% biełaruskaha pramysłovaj vytvorčaści, prychodzić u zaniapad. Kali tekstylnyja vytvorcy zbankrutujuć, tysiačy ludziej straciać svaje pracoŭnyja miescy. Švačka z Bresta Ludmiła Čančavik paviedamiła Belarus Digest, što bolšaści tekstylnych vytvorcaŭ brakuje klijentaŭ. Jana kaža, što sioleta pracavała tolki dva dni na tydzień.
Łukašenka biezdapamožny
Sproba zachavańnia «Kamvola» nahadvaje siužet stužki «Dzień surka». Niezdavoleny pradpryjemstvam urad adchilaje jaho kiraŭnictva i pavialičvaje subsidyi dla palapšeńnia jaho pracy. «Kamvol» niaźmienna niasie straty, pravakujučy novy vitok niezadavolenaści, a zatym pierastanoŭki kiraŭnictva i finansavych płyniaŭ.
Abiacany vizit-niespadziavanka Łukašenki na «Kamvol» u 2016 hodzie nie źmienić hetaj situacyi. Drenny stan spravaŭ pradpryjemtsva ahulnaviadomy, i vyrašeńnie jaho prablem vyhladaje małaimaviernym.
Niekalki hadoŭ tamu, ułady prapanavali stvaryć žyviołahadoŭčy kompleks aviečak, kab zabiaśpiečyć «Kamvol» ajčynnaj syravinaj zamiest voŭny, impartavanaj z Rasii. Hety płan nie ŭdaŭsia, bo stvareńnie pradpryjemstva aviečkahadoŭli z nula źjaŭlajecca darahim i ŭ Biełarusi adsutničajuć łuhi, nieabchodnyja dla pašy aviečak.
Ułady razhladali niekalki inšych alternatyŭ, naprykład, pryciahnieńnie prostych zamiežnych inviestycyj abo źlićcio «Kamvola» z paśpiachovym tkackim pradpryjemstvam. U 2011 hodzie tureckaja kampanija De Textile zajaviła pra hatoŭnaść inviestavać u «Kamvol». Ale, jak i mnohija inšyja zamiežnyja inviestary ŭ Biełarusi, De Textile nie daŭ rady dasiahnuć pahadnieńnia z uradam Biełarusi.
Źlićcio «Kamvola» zastajecca na paradku dnia, bo heta dazvolić schavać straty pradpryjemstva na papiery. Urad padrychtavaŭ prajekt adpaviednaha ŭkaza jašče ŭ 2014 hodzie, ale Łukašenka dahetul nie padpisaŭ jaho.
Biełaruskija ŭłady mała što mohuć zrabić, kab praduchilić zaniapad tekstylnaj pramysłovaści. Niahledziačy na asabisty ŭdzieł Łukašenki ŭ vyratavalnych apieracyjach i bujnyja sumy padtrymki, «Kamvol» čakaje niezajzdrosny los.
