Uviečary 22 śniežnia vyzvaleny biznesoviec, za spravaj jakoha sačyli mnohija. Pra heta paviedamlajuć internet-sajty sa spasyłkaj na siabroŭ pradprymalnika. U svaju čarhu, kiraŭnik pres-słužby Śledčaha kamiteta Siarhiej Kabakovič paviedamiŭ, što miera strymańnia ajcišniku źmieniena «z ulikam taho, što vykanany asnoŭnyja śledčyja dziejańni pa kryminalnaj spravie i całkam kampiensavana ŭsia škoda».
Letam, kamientujučy spravu ajcišnikaŭ, Śledčy kamitet paviedamlaŭ, što biznesmien nie pryznaje svajoj viny i admaŭlajecca kampiensavać dziaržavie škodu.
Pradprymalnik N. byŭ zatrymany 18 sakavika supracoŭnikami «Upraŭleńnia K» MUS. Pavodle infarmacyi śledstva, u pieryjad z 2005 pa 2008 biznesmien sa svaim partnioram pa biznesie ažyćciaŭlaŭ niezakonnuju pradprymalnickuju dziejnaść. Takoj śledstva ličyła raźmiaščeńnie ŭ internecie sajtaŭ i rekłamy bieź dziaržaŭnaj rehistracyi. Śledčy kamitet ličyŭ, što tym samym dziaržavie była naniesienaja škoda pamieram bolšym za $650 tysiač.
Na biźniesmiena byli raspačatyja jašče dźvie kryminalnyja spravy — pavodle art.243 KK Biełarusi (uchileńnie ad vypłaty padatkaŭ).
U śledčym izalatary pradprymalnik pravioŭ bolš za dziesiać miesiacaŭ.
Kalehi nazyvali jaho intelihientnym čałaviekam i talenavitym biznesoŭcam.
Mnohija ŭpłyvovyja ludzi sa śfiery IT zajaŭlali, što ŭtrymańnie pad vartaj strašyć patencyjnych inviestaraŭ u śfieru vysokich technałohij.
Kali dzirku ŭ zakanadaŭstvie interpretujuć jak parušeńnie zakona, to anałahičnaje pahražaje i inšym kampanijam, śćviardžali jany.
«Patencyjny niehatyŭny infarmacyjny efiekt, vyklikany zatrymańniem viadomaha IT-biznesmena, u značnaj miery zdolny nivielavać pryniatyja dziaržavaj namahańni pa farmiravańni ŭstojlivaha stanoŭčaha inviestycyjnaha klimatu», — zajaŭlaŭ SIEO finansavaha startapa Raman Hromaŭ.
«Biznesmien vioz u krainu miljony dalaraŭ i pryciahnuŭ by jašče sotni miljonaŭ, ale dla našaj dziaržavy jon bandyt», — zajaŭlaŭ zasnavalnik Tut.by Juryj Zisier.
Alaksieja Kamka, partniora biznesmiena, u lipieni 2015-ha asudzili da šaści hadoŭ uzmocnienaha režymu z kanfiskacyjaj majomaści.
Jak paviedamlaje Tut.by, ciapier biznesmen znachodzicca doma. Pavodle jaho słovaŭ, za čas znachodžańnia ŭ SIZA jon schudnieŭ na 20 kiłahramaŭ, pračytaŭ 150 knih i prosta ščaślivy, što ciapier u chacie, ź siamjoj.
