Premjer-ministr Rasii Dźmitryj Miadźviedzieŭ padpisaŭ pastanovu ab pamiery pošliny pry pastaŭkach hazu va Ŭkrainu na pieršy kvartał 2016 hoda, havorycca na aficyjnym sajcie pravavoj infarmacyi.
Zhodna z pastanovaj, pry raniej abvieščanaj infarmacyi, što kantraktnaja cana na pieršy kvartał składzie $230 za tys. kubamietraŭ. Infarmacyjnaje ahienctva «Interfaks» spačatku paviedamiła, što pamier skidki da kantraktnaj cany składzie $51,2 za tys. kubamietraŭ. Adpaviedna, prapanavanaja cana — kala $178,7 za tys. kubamietraŭ.
Paśla jano źmianiła ličbu na $212 paśla skidki.
Raniej, ministr enierhietyki i vuhalnaj pramysłovaści Ukrainy Uładzimir Dziamčyšyn kazaŭ, što Ukraina hatovaja zakuplać haz u RF u pieršym kvartale 2016 tolki pry źnižeńni cany da ŭzroŭniu mienšaha za $200 za 1 tys. kub.m.
Akramia taho, Ukraina zajaviła pra pavieličeńnie taryfaŭ za tranzit u piać razoŭ. Pakul niajasna, ci admovicca Kijeŭ ad takoha kroku ŭzamien za rezkaje źnižeńnie cany hazu.
U 2014 i 2015 hadach Ukraina imknułasia nie abvastrać adnosin z Rasijaj, jakija pahražali pieraraści z łakalnaj baraćby za Danbas u poŭnamaštabnuju vajnu. Ciapier Kijeŭ namahajecca adekvatna reahavać na kožny krok Maskvy.
Prapanavanyja Maskvoj skidki — najbolšyja ad 2004 hoda. Dla paraŭnańnia, Biełaruś maje zakuplać haz prykładna pa 140 dalaraŭ, prytym što jana addała «Hazpromu» «Biełtranshaz». Nažnicy cany miž Biełaruśsiu i Ukrainaj, takim čynam, źmianšajucca. Raniej typovaja roźnica składała 100 dalaraŭ, a ŭ hady, kali Rasija ekanamična dušyła Ukrainu, rychtujučy anieksiju Kryma i sprobu anieksii tak zvanaj «Navarosii», jana dachodziła da 200 dalaraŭ.
Źmianšeńnie nažnic pryviadzie da padzieńnia kankurentazdolnaści biełaruskich tavaraŭ adnosna ŭkrainskich i źmianšeńnia roźnicy ŭ zarobkach u dźviuch krainach.
Ukrainie ŭdałosia dabicca źnižak na haz najpierš dziakujučy paśpiachovaj pabudovie hazapravodaŭ dla reviersnych pastavak hazu ź Jeŭropy. Ułady Alaksandra Łukašenki takich inviestycyj nie ažyćciaŭlali. Jany rabili staŭku na dasiahnieńnie minimalnych cen na naftu i haz uzamien za vasalnaje vajskova-palityčnaje padparadkavańnie Maskvie.
Na hety momant forvardnyja kantrakty na pieršy kvartał na jeŭrapiejskich chabach tarhujucca na ŭzroŭni $170 za 1 tys. kubamietraŭ.
