MUS prapanuje libieralizavać KaAP dla aŭtamabilistaŭ. Pra heta zajaviŭ načalnik hałoŭnaha ŭpraŭleńnia achovy pravaparadku i prafiłaktyki MUS Raman Mielnik, jak paviedamlaje BiełTA.
Jon prapanuje «łajalna reahavać na niaznačnyja parušeńni Praviłaŭ darožnaha ruchu». Siarod mahčymych źmienaŭ — admiena adkaznaści za pieravyšeńnie chutkaści ruchu ad 10 da 20 km/h.
«Heta budzie spryjać ustalavańniu ŭzajemarazumieńnia pamiž supracoŭnikami DAI i kiroŭcami i ŭ cełym źnizić narakańni na pracu milicyi», — skazaŭ Raman Mielnik.
U vypadku realizacyi hetaha novaŭviadzieńnia ŭ nasielenych punktach možna budzie jeździć biez štrafa na chutkaści 80 km/h. Takaja ž norma dziejničaje ŭ Rasii. A voś jeŭrapiejskija krainy dla biaśpieki piešachodaŭ stroha abmiažoŭvajuć chutkaść pierasoŭvańnia ŭ haradach — nie bolš za 50 km/h.
Admiena adkaznaści za drobnyja parušeńni dazvolić vypravić statystyku. Za 2015 hod było zarehistravana kala 3,8 miljona pravaparušeńniaŭ, ź ich za pieravyšeńnie chutkaści — amal 890 tysiač. Ličba istotna vyrasła paśla ŭviadzieńnia fotafiksacyi parušeńniaŭ chutkaści.
